Bakı. Trend:
ABŞ dağıdıcı Melissa qasırğasından zərər çəkmiş Karib ölkələrinə təxminən 12,5 milyon dollar əlavə yardım göstərəcək.
Trend xəbər verir ki, ABŞ Dövlət Departamentinin yaydığı açıqlamada təcili humanitar yardım olaraq Yamaykaya təxminən 10 milyon dollar, Haitiyə isə 2,5 milyon dollar göndəriləcəyi bildirilib.
Yardım vəsaitləri zibillərin təmizlənməsi, təcrid olunmuş ərazilərə çıxışın təmin edilməsi, müvəqqəti sığınacaq, tibbi yardım, gigiyena məhsulları və qida təchizatı üçün istifadə olunacaq.
Bu, Melissa qasırğasından sonra ABŞ-ın ümumi yardım məbləğini təxminən 37 milyon dollara çatdırır. O cümlədən Yamayka üçün 22 milyon dollar, Haiti üçün 11 milyon dollar, Kuba üçün 3 milyon dollar və Baham adaları üçün 500 min dollar ayrılıb.
Maksimum 5-ci kateqoriyaya çatan Melissa qasırğası Haiti, Yamayka və Kubada genişmiqyaslı dağıntılara səbəb olub.
Haiti və Yamaykada baş verən daşqınlar nəticəsində 75 nəfər həyatını itirib, Yamayka Baş naziri Endryu Holness isə dəyən ziyanın 6 milyard dollardan çox olduğunu bildirib.