Bakı. Trend:
İspaniya ilə Cəbəllütariq arasındakı uzunluğu bir kilometrdən çox olan tarixi sərhəd hasarı son günlərini yaşayır.
2026-cı il iyulun 15-dən etibarən Böyük Britaniyanın xarici ərazisi ilə İspaniya arasındakı münasibətlərdə yeni mərhələ başlayacaq: quru sərhədindəki ənənəvi fiziki maneələr və müntəzəm miqrasiya yoxlamaları aradan qaldırılacaq.
BBC-nin verdiyi məlumata görə ərazini pasport nəzarətinin yeni qaydalarından tutmuş giriş zonasının tam yenidən qurulmasına qədər genişmiqyaslı dəyişikliklər gözləyir.
Cəbəllütariqin gələcəyi ilə bağlı razılıq Böyük Britaniya və Avropa İttifaqı tərəfindən 2025-ci ilin iyununda, İspaniya və Cəbəllütariq hakimiyyətinin iştirakı ilə aparılan uzunmüddətli danışıqlardan sonra əldə edilib. Saziş layihəsi 2026-cı ilin fevralında dərc olunub və onun müvəqqəti tətbiqi 2026-cı il iyulun 15-dən nəzərdə tutulur.
Yeni sistemin əsas məqsədlərindən biri Cəbəllütariqlə İspaniyanın La-Linea-de-la-Konsepsion şəhəri arasındakı quru sərhədində insanların müntəzəm yoxlamalarının ləğv edilməsidir. Bununla belə, 40 min nəfərə yaxın əhalisi olan Cəbəllütariq nə Avropa İttifaqına, nə də Şengen zonasına üzv olmur. Hər gün iş və ya şəxsi səbəblərlə sərhədi keçən minlərlə insan üçün bu, quru keçid məntəqəsindəki ənənəvi növbələrin aradan qalxması demək olacaq.
Paralel olaraq, Cəbəllütariq hakimiyyəti yüksək mühafizə səviyyəsinə malik yeni 4-cü kateqoriyalı hasar quraşdırır. Oxşar konstruksiyalar Böyük Britaniyanın hərbi obyektlərinin qorunması üçün istifadə olunur. Yeni hasar xətti dənizdən hava limanının ərazisinə qədər uzanır. Ənənəvi piyada keçidinin yerləşdiyi təxminən 150 metrlik hissədə daimi hasar olmayacaq. Məhz burada təhlükəsizlik tədbirləri əhəmiyyətli dərəcədə gücləndiriləcək.
Ərazidə hüquq-mühafizə orqanlarının daimi iştirakı, genişləndirilmiş videomüşahidə kameraları şəbəkəsi və avtomobil nömrələrinin avtomatik tanınması sistemləri nəzərdə tutulub.
Köhnə metal konstruksiyaları kameralar, avtomatik tanınma sistemləri və polis qüvvələrinin gücləndirilmiş iştirakı ilə təmin edilən müasir təhlükəsizlik sistemi əvəz edəcək.
