Qazaxıstandan Atasu-Alaşankou neft kəməri ilə nəql edilən xam neft partiyası Çinə daxil olub.
Beləliklə, bu neft kəmərinin rəsmi surətdə istismarı başlayıb. Bu barədə Trend RBK-ya istinadən xəbər verir.
Aprelin 25-də "Transneft"in prezidenti Semyon Vaynştok bildirib ki, 2006-cı ildə Rusiya şirkətləri tərəfindən Atasu - Alaşankou kəməri ilə neft nəqlinin həcmi 1,3 mln t təşkil edəcək.
Uzunluğu 988 km, borusunun diamerti 0,81 m olan Atasu - Alaşankou neft kəmərinin tikintisinə 2004-cu ilin sentyabrında başlanıb. $800 mln dəyərində olan bu layihəni CNPC və "KazMunayQaz" gerçəkləşdirib. Bunun üçün "Qazaxıstan-Çin boru kəməri" müştərək şirkəti yaradılıb. Maliyyə xərclərini Çin tərəfi çəkib.