"GUAM-ın MDB ərazisində dondurulmuş münaqişələrlə bağlı qətnaməsi hələ rəsmi olaraq BMT Baş Assambleyasına təqdim olunmayıb, hələ sənəd barədə üzv dövlətlər arasında müzakirələr aparılır", Ermənistan xarici işlər naziri Vardan Oskanyan Yerevanda mətbuat konfransında bəyan edib.
Onun sözlərinə görə, BMT baş katibi Ban Gi Munla görüşdə Ermənistan tərəfindən bu qətnamənin bütün neqativ aspektləri təqdim olunub və onun BMT Baş Assambleyasının gündəliyinə salınması mümkündür. "GUAM-ın həll olunmamış münaqişələrə diqqətini artırmaq arzusuna gəlincə, bunu qətnaməsiz də etmək mümkündür", - deyə Ermənistan Respublikasının xarici siyasət idarəsinin rəhbəri qeyd edib. Bu barədə PanARMENIAN məlumat verir.
Bununla yanaşı, Vardan Oskanyan qeyd edib ki, oxşar münaqişə olmadığı kimi, universal həll yolu da yoxdur. "Bir həlletmə modelini, məsələn, Kososvo modelini indiki vaxtda Dağlıq Qarabağ münaqişəsinin həll olunmasına tətbiq etmək olmaz. Bu cür yanaşma həqiqətə uyğun gəlmir", - deyə Oskanyan qeyd edib.