Azərbaycan, Bakı, 11 iyun /Trend/
ABŞ-da fəaliyyət göstərən "AzeriAmerika" diaspor təşkilatı Bakı 2015 Birinci Avropa Oyunlarına həsr olunmuş poçt markası hazırlayıb. Diasporla İş üzrə Dövlət Komitəsindən Trend-ə verilən məlumata görə, markanın üzərində Bakının simvoluna çevrilmiş Alov Qüllələrinin şəkli əks olunub və ingilis dilində "Bakı 2015 1-ci Avropa Oyunları" sözləri yazılıb.
Markanın müəllifi ABŞ-da yaşayan 7 yaşlı Mikayıl Əliyevdir.
Qeyd edək ki, "AzəriAmerika" təşkilatı 2009-cu ildə ABŞ-ın Konnektikut ştatının Farmington şəhərində təsis edilib. Təşkilat 2009-cu ildən ABŞ-Azərbaycan, ABŞ-Kanada əlaqələrinə dair ən son xəbərləri azəriamerika.com saytı vasitəsilə yayımlayır.
Təşkilatın təsis olunmasında başlıca məqsəd Azərbaycan mədəniyyətinin, incəsənətinin, tarixinin, dilinin, adət-ənənəsinin, həyat tərzinin və qabaqcıl siyasətinin təbliğ olunmasıdır.