Azərbaycan, Bakı, 9 fevral /Trend/
Dietoloqlar bütün dünyada geniş yayılmış piylənmə ilə mübarizənin olduqca orijinal üsulunu təklif ediblər. Onlar yeməklərin çox hissəsinə Çili bibəri və ya onun cövhərinin əlavə edilməsini təklif edirlər ki, bu da enerji yandıran boz piy hüceyrələrinin yaranmasına səbəb olacaq. Trend xəbər verir ki, bu barədə RİA Novosti ABŞ-ın Biologiya-Fiziologiya Cəmiyyətinin mətbuat xidmətinə istinadən xəbər verir.
ÜST-nin son məlumatlarına əsasən, ötən əsrin 80-ci illərindən başlayaraq dünyada qlobal piylənmə epidemiyası müşahidə olunur. Ötən il Yer kürəsinin hər 3 sakinindən biri, ümumilikdə 1,9 milyard insan, artıq çəkidən, onların təxminən 15 faizi piylənmənin ağır formasından əziyyət çəkib. Təşkilatın məlumatına görə, xəstəliklərin 47 faizi, məsələn, ürək-damar xəstəlikləri, diabet və xərçəng piylənmə ilə bağlıdır.
Alimlər bu problemin insanların çox zaman həddindən artıq yüksək kalorili yağlı qidaların qəbulu nəticəsində əmələ gəldiyini bildirirlər. Tibbi təcrübə göstərir ki, insanı yağlı qidadan imtina etməyə inandırmaq asan deyil, əgər o, gecə növbəsində və ya gərgin işdə çalışırsa, sadəcə mümkün deyil.
Alim Vivek Krişnanın sözlərinə görə, bədənimizdə iki tip piy hüceyrəsi mövcuddur: onlardan biri enerji toplayan ağ, digəri isə onu yandırıb istiliyə çevirən boz hüceyrədir. Əgər siz yüksək kalorili qidalar yeyib az hərəkət edirsinizsə, bu zaman metabolizmdə balans pozulur və bu da piylənməyə səbəb olur. Alimlər artıq çəki ilə mübarizə strategiyası axtararkən müəyyən ediblər ki, bibərin tərkibindəki yandırıcı kapsaitsin maddəsi piylənməyə mane olur.
Alimlərin sözlərinə görə, buna səbəb bu maddənin ağ piy hüceyrələrini artıq kaloriləri yandıran boz hüceyrələrə çevrilməyə məcbur etməsidir. Dietoloqlar hələlik bunu nə üçün baş verdiyini bilməsələr də, bu onlara maddənin bu xüsusiyyətindən orqanizmin xeyrinə istifadə etmələrinə mane olmur.
Mütəxəssislər hazırda mütəmadi olaraq kapsaitsin maddəsi ifraz edəcək xüsusi nanohissəciklərin hazırlanması üzərində çalışırlar. Onlar əmindirlər ki, belə dietik əlavələr bəşəriyyətin sağlamlığı üçün ən təhlükəli xəstəlik olan piylənmənin qarşısının alınması və müalicəsinə kömək edəcək.