Azərbaycan, Bakı, 23 oktyabr /Trend, müxbir Ü.Sadıqova/
Azərbaycan son vaxtlar bir çox sahələrdə uğura nail olub, Ermənistan isə əksinə, çox şey itirib. Buxarest Siyasi və İnzibati Araşdırmalar üzrə Milli Məktəbin professoru, həmçinin, Münaqişələrin Qarşısının Alınması və Erkən Xəbərdarlıq Mərkəzinin rəhbəri Yulian Çifu (İulian Chifu) belə hesab edir.
"Buna səbəb Azərbaycanın Avropanın enerji təhlükəsizliyinin təminatına kömək edə biləcək mühüm əhəmiyyətə malik olmasıdır", - ekspert Trend-ə bildirib.
Çifu hesab edir ki, Azərbaycan nə qədər ki öz enerji resursları ilə Avropanı təmin etməyə hazırdır, Avropa İttifaqı ölkələri Bakını dəstəkləməkdə davam edəcək.
Lakin onun sözlərinə görə, əgər Azərbaycan öz enerji resurslarını Avropyaya deyil, Asiya istiqamətində, məsələn, Çinə satmağa başlasa, o zaman Qərb ölkələrinin mövqeyi dəyişə bilər.
"Və ola bilsin, belə təqdirdə Avropanın Azərbaycana və Ermənistana münasibətində Fransadakı güclü erməni diasporu güclü rol oynasın", - o bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.