Azərbaycan, Bakı, 29 aprel /Trend, müxbir E.Tariverdiyeva/
Soçi görüşündən sonra Dağlıq Qarabağ münaqişəsinin nizamlanması prosesində irəliləyiş müşahidə edilir. Trend-in məlumatına görə, bu barədə cümə günü jurnalistlərə ABŞ-ın Azərbaycandakı səfiri Metyu Brayza deyib.
"Bu gün münaqişə tərəflərinin xarici işlər nazirləri bu məsələ ilə ciddi şəkildə məşğul olurlar və güman edirəm ki, prezidentlər addım-addım Dağlıq Qarabağ münaqişəsinin nizamlanması prosesində irəliləyişə nail olacaqlar", - Brayza qeyd edib.
ABŞ-ın Cənubi Qafqaz ölkələrindəki səfirlərinin Gürcüstanda görüşləri ilə bağlı səfir qeyd edib ki, Dağlıq Qarabağ münaqişəsi daxil olmaqla, regional təhlükəsizlik məsələləri müzakirə olunub.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.