Azərbaycan, Bakı, 21 iyun /Trend, müxbir E.Tariverdiyeva/
NATO baş katibi köməkçisinin müavini Ceymi Şi deyib ki, alyans qarşısına ATƏT-in Minsk qrupunu əvəz etmək məqsədini qoymur və Qarabağ münaqişəsi zonasında sülhməramlı əməliyyatlarda özünün mümkün hipotetik iştirakını müzakirə etməyə hazır deyil.
Trend-in məlumatına görə, bu barədə Şi çərşənbə axşamı NATO-nun Ermənistandakı İnformasiya Mərkəzində alyansın mənzil-qərargahı ilə tele-körpü zamanı deyib. Məlumatı "Medimaks" yayıb.
Onun sözlərinə görə, NATO-nun sülhməramlı əməliyyatlarda mümkün iştirakını müzakirə etmək üçün bir sıra komponentlər olmalıdır: müanqişə tərəflərinin bununla bağlı müraciət etmələri, müvafiq beynəlxalq mandatın olması, NATO iştirakçı ölkələrinin belə əməliyyatda iştiraka razılığı.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.