Azərbaycan, Bakı, 18 iyul /Trend/
Türkiyənin xarici işlər naziri Əhməd Davudoğlu və ABŞ dövlət katibi Hillari Klinton Dağlıq Qarabağ münaqişəsinin nizamlanması yollarını müzakirə ediblər. Trend-in məlumatına görə, bu barədə "Star" qəzeti yazır.
Tərəflər Qafqazdakı vəziyyəti, o cümlədən Dağlıq Qarabağ münaqişəsinin nizamlanması yollarını ətraflı şəkildə müzakirə ediblər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.