Fransa səfiri: Dağlıq Qarabağ münaqişəsi yalnız sülh yolu ilə həll olunmalıdır

Azərbaycan, Bakı, 30 oktyabr /Trend/

Dağlıq Qarabağ münaqişəsi sülh yolundan başqa hansısa nizamlanma yoluna malik deyil. Trend-in Ermənistan KİV-ə istinadən verdiyi məlumata görə, bunu Fransanın Ermənistandakı fövqəladə və səlahiyyətli səfiri Anri Reno çərşənbə axşamı Yerevan Dövlət Universitetinin tələbələri ilə görüşdə deyib.

"Qarabağ münaqişəsinin sülh yolu ilə nizamlanmasının alternativi yoxdur və ATƏT-in Minsk qrupunun həmsədr ölkələri problemin həlli üçün əlindən gələni edir. Halbuki, əslində Ermənistan və Azərbaycan tərəflərindən başqa heç kim bu münaqişəsi həll edə bilməz", - Reno bildirib.

Onun sözlərinə görə, dünyada münaqişələrin nizamlanması üçün universal üsul mövcud deyil, çünki hər bir qarşıdurmanın özünəməxsus xüsusiyyətləri var.

"Mən bunun çox çətin olduğunu anlayıram. Buna baxmayaraq, Qarabağ münaqişəsi həll olunmalıdır", - səfir bəyan edib.