Azərbaycan, Bakı, 30 yanvar / müxbir E.Hüseynli/ Azərbaycan MİQ-29 tipli təyyarələrdən imtina etməlidir. "Azərbaycan Müdafiə Nazirliyi Sovet Ittifaqı dövründə istehsal olunan hərbi texnikadan istifadəni dayandırmalıdır"- çərşənbə günü Trend ə müstəqil hərbi ekspert, Silahlı Qüvvələrə Demokratik Vətəndaş Nəzarəti Azərbaycan Mərkəzinin rəhbəri Ələkbər Məmmədov bildirib.
Yanvarın 29-da Müdafiə Nazirliyinin Hərbi Hava Qüvvələrinə məxsus MİQ-29 təyyarəsi təlim uçuşu keçirərkən qəzaya uğrayıb. Nəticədə, təyyarədə olan hər iki pilot-Fəxrəddin Əsgərov və Əfqan Aslanov həlak olub. MİQ-29 tipli təyyarləri təlim uçuşu həyata keçirərkən Rusiya, Malaziya, Peru, Slovakiya və Ermənistanda da qəzaya uğrayıb.
Məmmədov deyib ki, Azərbaycanda MİQ-29-un qəzaya uğraması ən çox təyyarənin texniki problemi ilə bağlı ola bilər. Faciənin pilotların bilik səviyyəsinin aşağı olması ucbatından baş verməsi ehtimalı azdır. "MİQ-29 təyyarələrinin bir neçə ölkədə qəzaya uğraması onu göstərir ki, bu tipli təyyarələrdə istehsal qüsurları var"- hərbi ekspert əlavə edib. Onun sözlərinə görə, görünür, təyyarənin kapapultu da işləmədiyindən, pilotlar ondan istifadə edə bilməyib, nəticədə, həlak olublar.
MİQ-29 təyyarəsi Rusiya istehsalıdır və 1971-ci ildən istehsal olunur, dördüncü nəslə aiddir. MİQ-lər Azərbaycan hava sərhədlərini qorumaq və hava döyüşlərində üstünlük qazanmaq üçündür. Dördüncü nəsil MİQ-29 NATO təsnifatına görə "Fulcrum" adlandırılır. Təyyarənin uzunluğu 14.8 metr, qanadlarının uzunluğu 11.4 metr, hündürlüyü 4.3 metrdir. Təyyarənin hərbi sursatla birgə çəkisi 15 min 300 kiloqramdır. Maksimal sürət 2400 kilometr/saatdır. Təyyarə maksimum 18 min metr yüksəkliyə qalxa və 2100 kilometr məsafəni qət edə bilir. "Fulcrum"un 30 millimetrlik QŞ-301 tipli topu var. QŞ-301 dəqiqədə 1500 atış edir. Təyyarə UR-60 və R-27 tipli raketlərlə təchiz edilib. MİQ-29 230-240 kilometrdən hava hədəflərini məhv etmək qabiliyyətinə malikdir.
Azərbaycan Müdafiə Nazirliyinin mətbuat xidmətinin rəhbəri Eldar Sabiroğlu isə, Trend ə bildirib ki, hadisənin hansı səbəbdən baş verdiyini müəyyənləşdirmədən, versiyalar irəli sürmək düzgün deyil. Hadisənin texniki səbəblərdən baş verib-vermədiyi barədə "qara qutu" tapıldıqdan sonra danışmaq olar.
