Azərbaycan, Bakı, 18 fevral / Trend İ.Əlizadə/ Azərbaycan Parlamentinin İnsan hüquqları komissiyasının sədri hesab edir ki, hüquq mühafizə orqanlarında, hərbi qüvvələrdə və həbsxanalarda insanlara işgəncə verilməsi faktları mövcud deyil. "Ona görə də işgəncə faktlarının araşdırılması üçün xüsusi İşçi qrupun yaradılmasına ehtiyac yoxdur" -deyə bazar ertəsi Trend ə açıqlamasında Milli Məclisin İnsan hüquqları daimi komissiyasının sədri Rəbiyyət Aslanova bildirib.
Azərbaycan İşgəncələrə Qarşı Komitənin 2007-ci illə bağlı açıqladığı hesabata görə, ölkədə hələ də insanlara işgəncə verilməsi faktları mövcuddur. Komitənin məlumatına görə, ən çox işgəncə hallarına ordu sıralarında rast gəlinir. Komitə sədri Elçin Behbudov hesab edir ki, işgəncə faktlarının araşdırılması və bunun qarşısının alınması üçün xüsusi İşçi qrup yaradılmalıdır. Behbudov İşçi qrupun yaradılması ilə bağlı prezident İlham Əliyevə müraciət edib.
Azərbaycanın işgəncələr əleyhinə beynəlxalq konvensiyalara qoşulduğunu və öz üzərinə öhdəliklər götürdüyünü deyən komissiya sədri qeyd edib ki, Azərbaycan işgəncə hallarının qarşısının alınması ilə bağlı öhdəliklərini tam olaraq yerinə yetirir: "Beynəlxalq təşkilatların hesabatlarında da bildirilir ki, Azərbaycanda işgəncə halları yoxdur".
Aslanova vurğulayıb ki, Ədliyyə Nazirliyinin yanında müxtəlif Qeyri-Hökumət Təşkilatlarının rəhbərlərindən ibarət İctimai Komitə fəaliyyət göstərir: "İctimai Komitə üzvlərinin həbsxanalara getmək, monitorinq aparmaq və aşkarladıqları mənfi hallarla bağlı Ədliyyə Nazirliyini məlumatlandırmaq hüquqları var. Əgər polisin fəaliyyətindən hər hansı şikayət varsa, Daxili İşlər Nazirliyinə müraciət etmək lazımdır".
Komissiya sədri bildirib ki, eyni zamanda, Azərbaycanda insan hüquqlarının təmin olunmasına nəzarət etmək üçün ombudsman təsisatı yaradılıb. Milli Məclisin İnsan hüquqları komissiyası fəaliyyət göstərir. "Aşkar olunan mənfi hallarla bağlı bu təsisatlara müraciət etmək olar. Amma QHT-lər indiyə qədər bir dəfə də komissiyaya müraciət etməyiblər. Əgər belə faktlar bizə təqdim olunsa, onu araşdırıb, həll etmək üçün bütün imkanlarımız var" - deyə Aslanova əlavə edib.
Ombudsman Elmira Süleymanova ötən ilin sonlarında jurnalistlərə açıqlamasında bildirib ki, Azərbaycanda əsasən polis orqanlarında vətəndaşlara işgəncə verilməsi faktlarına rast gəlinir.
Ədliyyə Nazirliyi yanıda İctimai Komitənin üzvü, Azərbaycan İşgəncələr Qarşı Komitənin sədri Elçin Behbudov isə bildirib ki, vətəndaşlar əsasən ibtidai istintaq zamanı işgəncəyə məruz qalırlar: "Məqsəd insanlardan etirafedici və ya kiminsə əleyhinə ifadə almaq olur. İşgəncə halları əsasən əməliyyatçıların, təhqiqatçıların və müstəntiqlərin iş otağında verilir".
Hüquq müdafiəçisi bildirib ki, çox az hallarda kimlərsə işgəncə hallarına görə cəzalandırılır: "Cəzalandırılanda da onlar vəzifə səlahiyyətlərini aşma, vəzifə səlahiyyətlərindən sui-istifadə maddələrilə məsuliyyətə cəlb olunurlar. Çünki məhz işgəncə verməyə görə cəza daha ağırdır". İşgəncə hallarının bu gün də davam etdiyini deyən Behbudov əlavə edib ki, vətəndaşlar fiziki zorakılıqlarla yanaşı, mənəvi-psixoloji işgəncələrə də məruz qalırlar: "Şəxs natəmiz yerdə, antisanitariya şəraitində saxlanılırsa, yeməklə təmin olunmursa, gəzintiyə çıxarılmırsa, bunun özü də işgəncədir".
