...

Azərbaycanda vətəndaşların könüllü olaraq ictimai fəaliyyətlə məşğul olmaları ilə bağlı qanun layihəsi hazırlanıb

Siyasət Materials 20 Fevral 2008 12:16 (UTC +04:00)

Azərbaycan, Bakı, 20 fevral / Trend , İ.Əlizadə/ Azərbaycanda vətəndaşların könüllü olaraq əvəzi ödənilməyən ictimai fəaliyyətlə məşğul olmaları ilə bağlı qanun layihəsi hazırlanıb. "Könüllülük fəaliyyəti haqqında" qanun layihəsi könüllü fəaliyyətin hüquqi əsaslarını müəyyən edəcək" - deyə çərşənbə günü Trend ə açıqlamasında Milli Məclisin Sosial siyasət daimi komissiyasının sədri Hadi Rəcəbli bildirib. Onun sözlərinə görə, "Könüllülük fəaliyyəti haqqında" qanun layihəsi Azərbaycan qanunvericiliyi ilə qadağan edilməyən, əsas iş yeri ilə bağlı olmayan işlərin görülməsi, xidmətlərin göstərilməsi və dəstəyin verilməsi ilə əlaqədar fəaliyyəti hüquqi yolla tənzimləyəcək.

Komissiya sədri bildirib ki, qanun layihəsi dünyada geniş yayılan və Azərbaycanda da mövcud olan könüllülük fəaliyyətini tənzimləməklə yanaşı, vətəndaş cəmiyyətinin, demokratik proseslərin inkişafına təkan verən hüquqi bazanı da möhkəmləndirəcək.

Qanun layihəsində könüllülük fəaliyyətinin növləri, iştirakçıların vəzifələri, hüquqları, beynəlxalq əlaqələr, bu növ fəaliyyətin hansı sahələr üzrə həyata keçirildiyi əksini tapıb. Faydalı ictimai problemlərin həlli ilə məşğul olan könüllülər vətəndaş cəmiyyətləri tərkibində fəaliyyət göstərə, eləcə də birləşib qurum yarada bilərlər. Rəcəbli qeyd edib ki, sənədin hazırlanıb qəbul edilməsi həm də Azərbaycanın beynəlxalq qurumlarda təmsilçiliyindən irəli gəlir.

Qanun layihəsinin Parlamentin yaz sessiyasında birinci oxunuşda müzakirəyə çıxarılması planlaşdırılır.

Xəbər lenti

Xəbər lenti