Azərbaycan, Bakı, 22 fevral / Trend , müxbir K.Ramazanova/ Vaşinqton Ermənistan siyasi qüvvələrini dinc xarakterli nümayişlər keçirməyə çağırır.
"ABŞ Ermənistanda qəddarlıq, güc və cinayət görmək istəmir" - deyə cümə günü Trend a ABŞ-ın Azərbaycandakı səfirliyinin İctimaiyyətlə Əlaqələr Departamentinin rəhbəri Conatan Hnik bildirib.
Ermənistanda fevral ayının 19-da prezident seçkiləri keçirilib. MSK məlumatlarına əsasən, Respublika Partiyasının lideri, baş nazir Serj Sarkisyan qalib gəlib. Prezidentlik uğrunda yarışmada ikinci yeri respublikanın keçmiş prezidenti Levon Ter-Petrosyan tutub. Onun ardınca isə "Orinats erkir" müxalifət partiyasının lideri, parlament deputatı Artur Baqdasaryan qərarlaşıb.
Yerevanda prezident seçkilərinin nəticələrinə yenidən baxılmasını tələb edən Ermənistanın keçmiş prezidenti Ter-Petrosyan tərəfdarlarının etiraz aksiyaları davam edir. Ermənistan paytaxtının mərkəzində yerləşən Azadlıq meydanında təxminən 20 çadır qurulub və Ter-Petrosyan tərəfdarları bütün gecəni orada keçirib.
Henik vurğulayıb ki, ABŞ Ermənistandakı prezident seçkiləri ilə bağlı müşahidəçilərin rəylərini dəstəkləyir. "Missiya bir sıra problemlərin mövcudluğu barədə məlumat verdi və biz onların Ermənistan hakimiyyəti tərəfindən mümkün qədər tez həll olunmasını istərdik" - deyə Henik söyləyib.
Seçkilərdə qələbə münasibətilə artıq Rusiya və Fransa prezidentləri Vladimir Putin və Nikolya Sarkozi, Gürcüstan prezidenti Mixail Saakaşvili, Türkiyə prezidenti Abdulla Gül, KTRT-nın baş katibi Nikolay Boruca və Avropa İttifaqının siyasət və siyasi təhlükəsizlik məsələləri üzrə ali nümayəndəsi Xavyer Solano Sarkisyanı təbrik ediblər.