Azərbaycan, Bakı, 25 fevral / Trend , müxbir K.Zərbalıyeva/ Xocalı soyqırımı cinayəti üzrə daha 6 nəfər beynəlxalq axtarışa veriləcək.
Bu barədə Trend ə bazar retəsi Respublika Hərbi Prokurorluğunun mətbuat xidmətindən məlumat verilib.
Bildirilib ki, onların təqsirləndirilən şəxs qismində cəlb edilməsi barədə qərar hazırlanır.
Xocalı soyqırımını törətməkdə təqsirləndirilən 31 nəfər İnterpol vasitəsilə beynəlxalq axtarışa verilib. Həmin şəxslər Cinayət Məcəlləsinin soyqırımına görə məsuliyyət nəzərdə tutan 103-cü və digər maddələri ilə ittiham olunurlar. Xocalı soyqırımı cinayəti üzrə 1850 nəfər şahid və zərərçəkən qismində dindirilib.
26 fevral Xocalı soyqırımının 16-cı ildönümüdür. 1992-ci il fevralın 25-dən 26-na keçən gecə Ermənistan silahlı qüvvələri, Azərbaycanın Dağlıq Qarabağ ərazisindəki erməni silahlı dəstələri, keçmiş SSRİ-nin Xankəndində yerləşən 366-cı motoatıcı alayının şəxsi heyətinin və texnikasının bilavasitə iştirakı ilə Xankəndi və Əsgəran arasında yerləşən Xocalı şəhərini zəbt edərək, Azərbaycan xalqına qarşı soyqırım siyasətini həyata keçirib.
Xocalının işğalı zamanı bir gecədə dinc əhalidən 613 nəfər, o cümlədən 63 uşaq, 106 qadın, 70 qoca xüsusi amansızlıqla, işgəncələrlə öldürülüb, insanların başları kəsilib, gözləri çıxarılıb, hamilə qadınların qarınları süngü ilə deşik-deşik edilib. Səkkiz ailə bütövlükdə qətlə yetirilib. 487 nəfər yaralanıb. Yaralananların 76 nəfəri usaq olub. 1275 nəfər girov götürülüb, 150 nəfərin aqibətindən isə hələ də xəbər yoxdur.
Hücumda həmçinin mayor Oqanyan Seyran Muşeqoviçin komandanlığı altında 366-cı alayın 2-ci batalyonu, Yevgeni Nabokixinin komandası altında 3-cü batalyon, 1 saylı batalyonun qərargah rəisi Çitçyan Valeriy İsayeviç və alayda xidmət edən 50-dən artıq erməni zabit və praporşik iştirak edib.
Şəhər əhalisinin bir hissəsi zorakılıqdan qaçıb qurtarmaq istəyərkən əvvəlcədən düzəldilmiş pusqularda qətlə yetirilib.
Dörd gün ərzində Ağdama Xocalıda qətlə yetirilmiş 200 azərbaycanlının meyidi gətirilib, onlarla meyidin təhqirə məruz qalması faktı aşkar edilib. Ağdamda 181 meyid (130 kişi və 51 qadın, o cümlədən 13 uşaq) məhkəmə-tibbi ekspertizasından keçirilib. Ekspertiza zamanı müəyyən edilmişdir ki, 151 nəfərin ölümünə güllə yaraları, 20 nəfərin ölümünə qəlpə yaraları səbəb olub, 10 nəfər küt alətlə vurularaq öldürülüb.