Azərbaycan, Bakı, 26 fevral/ Trend , müxbir İ.Əlizadə/ Azərbaycan Parlamentində müxalifəti təmsil edən Müsavat deputat qrupu Təbii ehtiyatlar, energetika və ekologiya məsələləri daimi komissiyasının "Neft və qaz haqqında" qanun layihəsini geri qaytarmasını qanunsuz hesab edir. "Təbii ehtiyatlar, energetika və ekologiya məsələləri daimi komissiyasının rəhbərliyi "Daimi komissiyalar haqqında" və "Deputat statusu haqqında" qanunları pozub. Daimi komissiyanın hazırlanan qanun layihəsini geri qaytarmaq hüquqi yoxdur" - deyə çərşənbə axşamı Trend ə açıqlamasında Müsavat deputat qrupunun üzvü Pənah Hüseyn bildirib.
Parlamentin Təbii ehtiyatlar, energetika və ekologiya məsələləri daimi komissiyasının bir necə gün əvvəl keçirilən iclasında Müsavat deputat qrupunun təqdim etdiyi "Neft və qaz haqqında" qanun layihəsi müzakirə olunub. Komissiyanın qərarına əsasən, Azərbaycanda belə bir qanunun qəbul olunmasına ehtiyac yoxdur.
Müsavat deputat qrupunun üzvü bildirib ki, komissiyanın onlara verdiyi cavabla razı deyillər. "Bizə təqdim olunan sənəddə bir cümlə ilə yazılıb ki, komissiya belə bir qanunun qəbul olunmasını zəruri hesab etmir. Orada heç bir əsaslandırma yoxdur" - deyən Hüseyn qeyd edib ki, daimi komissiya hazırlanan və müzakirəyə təqdim olunan qanun layihəsini geri qaytara bilməz, yalnız belə bir qanunun qəbul edilməsinin zəruri olub-olmadığına dair rəy verə bilər: "Qanunun qəbul olunub-olunmamasına dair qərarı Parlamentin iclasında deputatlar verməlidir. Ona görə də Təbii ehtiyatlar, energetika və ekologiya məsələləri daimi komissiyası qanun layihəsini geri qaytarmaqla qanunu pozub. Bu onu göstərir ki, Parlament "Neft və qaz haqqında" qanunu qəbul etmək istəmir".
Millət vəkilinin sözlərinə görə, bu həftə yeindən Milli Məclisin sədri Oqtay Əsədova müraciət edəcək ki, qanun layihəsi müzakirəyə çıxarılsın.
Qanun layihəsi VI fəsildən və 33 maddədən ibarətdir. I fəsil - "Ümumi müddəalar, II fəsil - "Neft və qaz üzərində mülkiyyət hüququ və onun tənzimlənməsi", III fəsil - "Neft və qaz müqavilələri", IV fəsil - "Neft və qaz sahəsində iqtisadi məsələlər", V fəsil - "Ətraf mühitin və əməyin mühafizəsi", VI fəsil - "Yekun müddəalar" adlanır. Qanun layihəsi Azərbaycan ərazisində, o cümlədən Xəzər dənizinin Azərbaycan sektorunda neft və qaz axtarışı, kəşfiyatı, hasilatı, istismarı əməliyyatlarının və (və ya) boru kəməri əməliyyatlarının, neft və qaz gəlirlərinin idarə olunmasının hüquqi əsaslarını müəyyən edir və bu sahədə yaranan münasibətləri nizama salır. Layihədə neft və qaz siyasətinin həyata keçirilməsi sahəsində dövlətin vəzifələri, neft və qaz üzərində mülkiyyət hüququ ilə bağlı məsələlər, neft və qaz müqavilələri, onların zəruri şərtləri, bağlanması tələbləri və qaydaları, boru kəməri üzrə müqavilələrə dair əsas müddəalar, həmin müqavilələrlə əlaqədar iqtisadi, ekoloji və əməyin mühafizəsi məsələlərinin tənzimlənməsi qaydaları, neft gəlirlərinin idarə olunması məsələləri və s. öz əksini tapıb.
"Neft və qaz haqqında" qanunun qəbulu Azərbaycan dövlətinin neft ehtiyatları və gəlirlərindən maksimum faydalanmasını, əhalinin, xüsusilə də onun aztəminatlı hissəsinin neft gəlirlərindən bəhrələnmə səviyyəsinin yüksəlməsini və neft sektorunda şəffaflığın artmasını təmin edə bilər. Azərbaycan indiyədək xarici şirkətlərlə 30-dan artıq neft müqaviləsi imzalayıb.
