Azərbaycan, Bakı, 18 mart / Trend ", müxbir Q.Cəbiyev/ Azərbaycanda keçiriləcək prezident seçkisi müxalifət düşərgəsində keyfiyyətcə yeni dəyişikliyin yaranmasına gətirib çıxaracaq. "Seçki radikalizmi arxa plana qoyacaq. Daha çox praqmatik və ölkədə problemlərin həlli istiqamətində hakimiyyətin də resurslarını hər hansı bir şəkildə kənara qoymayacaq bir anlayışla mübarizə aparan qüvvələrə dəstək artacaq" çərşənbə axşamı Trend a müsahibəsində Böyük Quruluş Partiyasının (BQP) sədri, millət vəkili Fazil Qəzənfəroğlu bildirib.
Azərbaycanda seçkilər oktyabrda keçiriləcək. BQP seçkidə Qəzənfəroğlunun namizədliyini irəli sürmək niyyətindədir.
Millət vəkili deyib ki, Azərbaycanda narazı elektoratın siyasi müxalifətə çevrilməsi xeyli zəifləyib. "Müxalifət sıralarının artan tendensiya üzrə genişlənməsinin şahidi olmuruq. Əvvəlki ənənəvi müxalifətin sayının da azalmasını müşahidə edirik" Qəzənfəoğlu əlavə edib.
Onun sözlərinə görə, hakimiyyətin maddi imkanları artıb və iqtidarın asanlıqla zəifləyə biləcəyi təsəvvürü sıradan çıxıb. Narazı şəxslər müxalifətə qoşulmağa maraq göstərmirlər: "Bu da onun nəticəsidir ki, müxalifət öz gücünə əvvəlki qədər inanmır".
BQP 2004-cü ildə Qəzənfəroğlu tərəfindən təsis olunub. Partiya 2005-ci il seçkilərində iştirak edib.
