Azərbaycan, Bakı, 18 mart / Trend , müxbir C.Babayeva/ Martın 19-da müxalifət partiyalarının gənclər təşkilatlarının təsis etdiyi "Biz" koalisiyası Bakıda etiraz aksiyası keçirəcək. Bu barədə çərşənbə axşamı Trend a koalisiyada təmsil olunan Azərbaycan Gənclər Platformasının baş koordinatoru Nurəddin Babayev məlumat verib.
Koalisiyada Azərbaycanın Liberal, Demokrat, Xalq Cəbhəsi, Müsavat, Milli İstiqlal partiyalarının gənclər təşkilatları və müstəqil gənclər təşkilatları təmsil olunur. Koalisiyanın təsis olunmasında əsas məqsəd Azərbaycanın demokratik inkişafında gənclərin rolunu artırmaqdır.
Babayevin sözlərinə görə, etiraz aksiyasının keçirilməsi barədə qərar koalisiyanın növbəti iclasında qəbul olunub.
Etiraz aksiyasının məqsədi Azərbaycan cəmiyyətinin mövcud aktual siyasi problemə diqqətini artırmaqdır.
"Aksiya iştirakçılarının təhlükəsizliyinin təmin olunması üçün müvafiq tədbirlər görülüb. Aksiya dövlət qurumlarının yaxınlığında keçirilməyəcək" - deyə Babayev bildirib.
Onun sözlərinə görə, Novruz bayramından sonrakı ilk həftədə koalisiya ölkənin ali məktəblərini əhatə edəcək aksiya keçirməyi planlaşdırır.
Babayevin qeyd etdiyi kimi, sabahkı aksiyada koalisiyanın 30-35 üzvü iştirak edəcək.
