Azərbaycan, Bakı, 29 mart / Trend ", müxbir Q.Cəbiyev/ Hakim Yeni Azərbaycan Partiyası (YAP) bir qrup jurnalistin başladığı aclıq aksiyasını dayandırmağa çağırıb. "Məhkəmə hökmü ilə cəzaya məhkum olunmuş şəxslərin cəzalarını yüngülləşdirmək üçün seçdikləri forma və metodlar var. Hesab edirəm ki, aclıq yolu ilə ictimai diqqəti özünə cəlb etmək vasitəsi ilə heç kəs ona aid olan cəzadan xilas ola bilməz" şənbə günü Trend a YAP icra katibinin müavini, millət vəkili Mübariz Qurbanlı bildirib.
Üç gündür ki, bir qrup jurnalist "Gündəlik Azərbayjan" və "Realnıy Azerbaydjan" qəzetlərinin baş redaktoru Eynulla Fətullayevə dəstək məqsədilə "Yeni Müsavat" qəzetinin redaksiyasında başlatdığı aclıq aksiyasına qoşulub. Hazırda "Gündəlik Azərbaycan" qəzetinin şef-redaktoru Şahvələd Çobanoğlu, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı aksiyanı davam etdirirlər. Bu gün isə "Bizim Yol" qəzetinin əməkdaşı Natiq Cavadlı da aclıq aksiyasına qoşulub.
12 saylı Cəzaçəkmə Müəssisəsində saxlanılan Fətullayev isə martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir.
Qurbanlı vurğulayıb ki, cəzanın yüngülləşdirilməsi yalnız məhkəmə orqanlarının işidir. Cəzaya məruz qalmış şəxslərin əfv olunması isə Milli Məclisin qəbul etdiyi aministiya qərarı və prezidentin verdiyi fərman ilə ola bilər. Onun fikrincə, müxtəlif vasitələrlə cəzasını yüngülləşdirməyə yönələn addımlar atan şəxslərin bu hərəkətləri istənilən nəticə verməyəcək. Çünki Azərbaycana indiki şəraitdə hansısa kənar qüvvənin təzyiq göstərməsi real deyil.
YAP 1992-ci ildə Naxçıvanda mərhum prezident Heydər Əliyev tərəfindən təsis olunub. 14 ildən artıqdır hakimiyyətdə olan partiyanın hazırkı sədri prezident İlham Əliyevdir.