Azərbaycan, Bakı, 31 mart/ Trend , müxbir İ.Əlizadə/ Türkmənistan və Özbəkistan Türkdilli ölkələrin Parlament Assambleyasına qoşulmaqdan imtina edir. "Türkmənistan və Özbəkistanla Türkiyə və Qazaxıstan arasında problem və fikir ayrılığı var. Ona görə də bu, ölkələr Türkdilli ölkələrin Parlament Assambleyasına qoşulmaqdan imtina edirlər", -deyə bazar ertəsi Trend ə açıqlamasında Azərbaycanın Türkdilli Ölkələrin Parlament Assambleyasının yaradılması üzrə İşçi Qrupundakı milli katibi Səyyad Ələsgərov bildirib.
Martın 21-22-də Antalyada Türkdilli dövlətlərin Parlamentlərarası Şurasının ilk toplantısı keçirilib. Toplantıda Türkdilli Ölkələrin Parlament Assambleyasının yaradılması ilə bağlı niyyət protokolu imzalanıb. İclasda Azərbaycan, Türkiyə, Qazaxıstan və Qırğızıstan nümayəndələri iştirak edib.
Ələsgərov qeyd edib ki, Türkmənistan və Özbəkistan Türkdilli Ölkələrin Parlament Assambleyasının yaradılması üzrə İşçi Qrupun iki gün əvvəl Astanada keçirilən iclasına da qatılmaqdan imtina ediblər.
"Türkiyə Böyük Millət Məclisinin sədr müavini Türkmənistan və Özbəkistanın Türkdilli ölkələrin Parlament Assambleyasına qoşulması haqda danışıqlar aparmaq üçün Aşqabad və Daşkəndə səfər edəcək", -deyə milli katib bildirib.
O qeyd edib ki, Astana toplantısında assambleyanın yaradılması ilə bağlı sənədlərin razılaşdırılması başa çatdırılıb. Ələsgərovun sözlərinə görə, iclasda Antalyada imzalanan Niyyət Protokolunda əks olunan məsələlərlə bağlı müzakirələr aparılıb: "Qazaxıstan assambleyanın katibliyinin yaradılmasına etiraz edirdi. Buna səbəb kimi dövlət büdcəsində katibliyin yaradılması ilə bağlı vəsaitin ayrılmamasını göstərirdilər. Amma Qazaxıstanın etirazı katibliyin Türkiyədə yerləşməsi ilə bağlı idi. Qazaxıstan assambleyanın yaradılması ilə bağlı bütün təşəbbüsləri ələ almağa çalışırdı. Amma sonda assambleyanın katibliyinin yaradılması haqda razılıq əldə olundu. Katiblik Türkiyədə fəaliyyət göstərəcək".
Türkdilli Ölkələrin Parlament Assambleyasının toplantıları ildə bir dəfədən az olmayaraq keçiriləcək. Ələsgərov qeyd edib ki, ilk toplantı Türkiyədə keçiriləcək.
"Türkdilli Ölkələrin Parlament Assambleyasına sədrlik növbəlilik və əlifba sırası ilə həyata keçiriləcək, səlahiyyət müddəti isə bir il olacaq. Qurumun iclasları sədrliyi həyata keçirən ölkədə baş tutacaq. Parlament Assambleyasının işçi dili isə qurumda təmsil olunan ölkənin işçi dili olacaq", -deyə o, əlavə edib.
Onun sözlərinə görə, assambleyada hər bir ölkədən yeddi deputat təmsil olunacaq. Onlardan biri nümayəndə heyətinə rəhbərlik edəcək. Assambleyada qərarlar konsensus əsasında qəbul ediləcək: "Hər bir ölkə bir səsə malik olacaq. Əgər hansısa ölkə müzakirə olunan məsələnin əleyhinə olsa, qərar qəbul olunmayacaq".
Assambleyaya türkdilli olmayan ölkələr də qoşula bilər. Eyni zamanda, müxtəlif ölkələrin parlamentlərinin türk əsilli deputatları assambleyada məşvərətçi səs hüquqi ilə təmsil oluna bilərlər.
Assambleyanın yaradılması ilə bağlı son qərar türkdilli ölkələrin parlament sədrlərinin yaxın vaxtlarda keçiriləcək toplantısında veriləcək.
Bir sıra türkdilli ölkələrin parlamentlərinin üzv olacağı bu şuranın yaradılmasından məqsəd türkdilli ölkələr arasında parlamentlər birliyi şəklində ortaq bir mexanizmin qurulmasına və qarşılıqlı münasibətləri gücləndirərək siyasi baxışların uyğunlaşdırılmasına, təcrübə mübadiləsinə, birgə layihələrin həyata keçirilməsinə nail olmaqdan ibarətdir.