...

Azərbaycan müxalifəti ölkədə seçki mühitinin hiss olunmamasında hakimiyyəti günahlandırır

Siyasət Materials 31 Mart 2008 14:48 (UTC +04:00)

Azərbaycan, Bakı, 31 mart / Trend ", müxbir Q.Cəbiyev/ Azərbaycan müxalifəti ölkədə seçki mühitinin hiss olunmamasında hakimiyyəti günahlandırır. "Müxalifəti ciddi şəkildə narahat edən məsələ bu il ölkədə seçkilərin keçiriləcəyinin hiss olunmamasıdır. Hesab edirik ki, iqtidar seçki mühitini yaratmağa borcludur", bazar ertəsi Trend "a müxalif Açıq Cəmiyyət Partiyasının (ACP) sədri Akif Şahbazov bildirib.

Azərbaycanda prezident seçkisi oktyabrda keçiriləcək. İyunun sonlarında seçkiyə rəsmən start verilməsi planlaşdırılır.

Şahbazov hesab edir ki, artıq seçkiyə 7 aydan az vaxt qalmasına baxmayaraq, qarşıdan seçkinin gəldiyi belə duyulmur. "Təbii ki, belə vəziyyətin yaranmasında Azərbaycan müxalifətinin kifayət qədər nöqsanı var və mən bunu gizlətmirəm. Amma biz hesab edirik ki, iqtidar seçki mühitini yaratmağa borcludur" Şahbazov əlavə edib.

Sağtəmayüllü Azərbaycan Demokrat Partiyasının (ADP) sədri, partiyanın prezidentliyə namizədi Sərdar Cəlaloğlu da bildirib ki, iqtidar normal seçki mühtinin formalaşdırılması üçün addımlar atmalıdır. Bu məsələdə müxalifətin üzərinə daha az vəzifələr düşür.

Böyük Quruluş Partiyasının (BQP) sədri, millət vəkili Fazil Qəzənfəroğlu da ölkədə seçki mühitinin hiss olunmamasında daha çox iqtidarın günahkar olduğunu vurğulayıb.

Hakim Yeni Azərbaycan Partiyası (YAP) isə müxalifətin iddialarını qəbul etmir. Partiyanın icra katibinin müavini, millət vəkili Mübariz Qurbanlı Trend "a bildirib ki, ölkədə normal seçki mühiti var. Müxalifət bu mühitdən yararlanıb, seçkiyə hazırlaşa bilmirsə, günahı öz daxilində axtarmalıdır. O, YAP-ın prezident seçkilərinə yüksək səviyyədə hazırlaşdığını bəyan edib. "Bir məsələni dərk etmək lazımdır ki, prezident seçkisində qələbənin təmin olunmasında həlledici rol namizədlə bağlıdır. 2008-ci il seçkilərində YAP-ın namizədi olacaq partiyamızın sədri İlham Əliyevin seçki kampaniyasının gedişində özünün şəxsi nüfuzu və fəaliyyəti seçicilərin böyük əksəriyyətinin ona səs verməsinə gətirib çıxaracaq " Qurbanlı deyib.

Xəbər lenti

Xəbər lenti