Azərbaycan, Bakı, 09 aprel/ Trend , müxbir C.Babayeva/ Müxalifət partiyalarının gənclər təşkilatlarının təsis etdiyi "Biz" koalisiyası aprelin 24-də - qondarma "erməni soyqırımı" günündə "Azadlıq" meydanında mitinq keçirməyi planlaşdırır. Bu barədə çərşənbə günü Trend a koalisiyada təmsil olunan Müsavat Partiyasının gənclər təşkilatının sədri Tural Abbaslı məlumat verib.
Ermənilərin iddiasına görə, 1915-ci il aprelin 24-də Osmanlı İmperiyası onlara qarşı "soyqırım" törədib. Türkiyə hökuməti qondarma "erməni soyqrımı" iddialarını təkzib edir və rəsmi bəyanatlarda bildirilir ki, 1915-ci ildə Osmanlı İmperiyasında təhlükəsizliyin təmin edilməsi məqsədilə, orada yaşayan erməni əhalisinin bir yerdən digər yerlərə köçürülməsi qərarı heç bir halda "soyqırım" sayıla bilməz. Türkiyənin Baş naziri Rəcəb Tayyib Ərdoğan Ermənistana rəsmi müraciətlərində hər iki ölkənin arxivlərinin açılması, ortaq tarixçilər qrupu yaradılaraq, 1915-ci il hadisələrinin onlar tərəfindən araşdırılmasını təklif edib. Ermənistan tərəfi indiyədək bu müraciəti cavabsız qoyub.
"Biz" koalisiyasında Azərbaycanın Liberal, Demokrat, Xalq Cəbhəsi, Müsavat, Klassik Xalq Cəbhəsi, Milli İstiqlal partiyalarının gənclər təşkilatları və müstəqil gənclər təşkilatları təmsil olunur. Koalisiyanın təsis olunmasında əsas məqsəd Azərbaycanın demokratik inkişafında gənclərin rolunu artırmaqdır.
Abbaslının sözlərinə görə, yaxın iki gün ərzində koalisiya adından mitinq keçirilməsi ilə bağlı Bakı Şəhər İcra Hakimiyyətinə (BŞİH) müraciət olunacaq.
"Koalisiya "Azadlıq" meydanında ənənəvi mitinq deyil, orijinal formada mitinq keçirmək niyyətindədir", deyə Abbaslı qeyd edib.
Gənclər aksiyanın keçirilməsi üçün BŞİH-nin başqa yer təklifinə etiraz etmək niyyətində deyillər.
Abbaslının qeyd edtdiyi kimi, mitinqdə iştirak etmək üçün koalisiyada təmsil olunmayan bir sıra müstəqil gənclər təşkilatlarına bildirişlər göndəriləcək.