Azərbaycan, Bakı, 25 aprel/ Trend , müxbir D.Xatınoğlu, A.Qasımova / ABŞ-da keçiriləcək növbəti seçkilərdə hər hansı bir namizədin ölkənin İranla bağlı siyasətinə dair təklif və vədləri seçkilərdə qələbə üçün mühüm amildir. "İran məsələsi ABŞ-da keçiriləcək seçkilərdə böyük təsirə malikdir" - deyə amerikalı politoloq Qavdat Baxqat (Gawdat Bahgat) hesab edir.
İran İraqda öz nüfuzu altında olan terrorist qüvvələrə dəstək verməklə, ABŞ-da keçiriləcək növbəti seçkilərdə demokratların qələbə qazanmasına çalışır - deyə İraqın təhlükəsizlk nazirinin müşaviri Müvəffəq əl-Rəbii aprelin 24-də "Şərq əl-Əvsət" ərəb qazetinə verdiyi müsahibədə bildirib.
"İran ABŞ-dakı prezident seçkilərinə iki cəhətdən böyük təsir göstərə bilər" - deyə Yaxın Şərqin Tədqiqi üzrə Mərkəzin (ABŞ) direktoru Baxqat cümə günü Vaşinqtondan bildirib.
Onun fikrincə, İranın İraq ilə münasibətlərinin yaxınlaşması və ya əksinə, gərginləşməsi ehtimalı mövcuddur. "İranın fəaliyyəti hamının diqqətinin İraqdakı müharibəyə yönəlməsi ilə nəticələnə bilər. ABŞ-ın iki siyasi partiyası (Respublikaçılar və Demokratlar) və onların namizədləri İranla bağlı hansı tədbirlərin görülməsi barədə müxtəlif fikirlər səsləndiriblər" - deyə ABŞ politoloqu hesab edir.
Onun fikrincə, digər amil Birləşmiş Ştatlar ilə İran arasında hərbi qarşıdurma potensialı ilə əlaqəlidir ki, buna həm də İranın nüvə proqramı daxildir.
Baxqat düşünür ki, ABŞ-da hazırkı prezident seçkiləri zamanı əsasən iqtisadiyyatla bağlı narahatlıq dominantlıq edir. Amerika seçicilərinin əksəriyyəti iqtisadiyyata bir nömrəli problem kimi baxırlar və şübhəsiz ki, İraqda müharibə və İranla potensial hərbi qarşıdurma ölkənin iqtisadi səmərəliliyinə təsir göstərir.
"İran məsələsi ABŞ prezidentliyinə namizədlərin bir nömrəli təbliğat mövzusuna çevrilib" - deyə İran politoloqu Əhməd Zeydabadi (Ahmad Zeydabadi) hesab edir. Onun fikrincə, İran probleminin necə həll olunacağı barədə namizədlərin fikirləri, beynəlxalq terrorizm və nüvə silahının Yaxın Şərq ölkələrində istehsal olunmasının qarşısını almaqla bağlı görəcəkləri tədbirlər ABŞ xalqı üçün çox əhəmiyyətlidir. "Lakin mənim fikrimcə ABŞ-da kimin hakimiyyətə gəlməsindən asılı olmayaraq, İrana qarşı ABŞ-ın siyasəti və təzyiqləri dəyişməyəcək. Xüsusilə, müharibə variantı hər iki partiya namizədlərinin masası üzərindədir" - deyə Zeyabadi bu gün Tehrandan telefonla Trend -a bildirib.
Britaniyada fəaliyytət göstərən digər iranlı politoloq Əlirza Nurizadə (Ali Reza Nourizadeh) isə bu barədə Trend -a açıqlamasında bildirib ki, İranın İraqda yürütdüyü siyasətin ABŞ xalqının hansı cinaha səs verməsinə birbaşa böyük təsiri yoxdur, lakin İranla ədavətdə olan İsrail lobbilərinin hansı namizədi dəstəkləməsi təyinedici rol oynayır. "İran çalışır ki, İraqda sünni terrorçulara, xüsusilə də, "Ənsar əl-İslam", "Ənsar əl-Sünnəh" şəbəkələrinə, digər tərəfdən isə bəzi şiə qruplarına, xüsusilə "Mehdi" ordusuna yardım göstərməklə, qonşu ölkədə sabitliyi pozsun. Beləliklə də, hazırda Amerikada iqtidarda olan Respublika Partiyasının xarici siyasətinin uğursuz olduğunu göstərsin" -deyə İran-Ərəb Tədqiqat Mərkəzinin sədri Nurizadə bildirib.
Onun fikrincə, İranın bu siyasəti əks nəticə verəcək. "İraqda sabitliyin pozulması respublikaçıların seçkilərdə qələbə qazanmasına zəmin yaradacaq. Bu cinah İranla kəskin ziddiyətdədir və İrana qarşı daha da şiddətli mövqe tutur. ABŞ xalqı İranın qurduğu təxribatlara qarşı respublikaçıların qələbəsini vacib hesab edir" - deyə Nurizadə bildirib.