Azərbaycan, Bakı, 02 may / Trend , müxbir S.Bağırov/ Ağır Cinayətlərə Dair İşlər üzrə Hərbi Məhkəmədə hakim Zeynal Ağayevin sədrliyi ilə keçən iclasda dövlət ittihamçısı Azərbaycan Silahlı Qüvvələrinin 15 nəfər yüksək rütbəli zabitinə iş istəyib. Trend un məlumatına görə, dövlət ittihamçısı Arzu İbrahimova 10 il sınaq, 1 il hərbi vəzifə tutmaması, Mehdi Abbasova 7 il sınaq, dəymiş ziyanın 500 misli məbləğində təzminat ödəməsi, Füzuli Vəliyevə 2 il şərti həbs cəzası, Tahir Səfərova 2 il şərti həbs cəzası, Altay Məmmədova 3 il həbs cəzası, Asif Süleymanova 3 il 6 ay həbs, Sakit Əliyevə 3 il həbs, İlqar Səfərova 2 il şərti həbs, Rizvan Bayramova 2 il sınaq, Emin Əliyevə 2 il sınaq, Akif Bayramova dəymiş ziyanın 1000 mislini ödəmək, Ayaz Ağayavevin 1000 mislini, Nadir Qabilovun 2 min mislini, Əmiraslan Həsənovun 2 min mislini ödəmək, Valeh Qasımova 5 il həbs, 1 il vəzifə tutmamaq cəzası istəyib.
Növbəti proses mayın 8-də saat 10.30-a təyin olunub. Həmin iclasda vəkillərin çıxışı nəzərdə tutulur.
Dəstə üzvlərinə qarşı Cinayət Məcəlləsinin 179.3.1, 179.3.2-ci (mütəşəkkil dəstə tərəfindən külli miqdarda mənimsəmə və israf etmə), 313-cü (vəzifə saxtakarlığı) və 341-ci (vəzifə səlahiyyətlərini aşma) maddələri ilə ittiham irəli sürülüb. İttiham aktına görə, Azərbaycan Müdafiə Nazirliyinin Hava Hücumundan Müdafiə Qoşunları və Hərbi Hava Qüvvələrinin Şəmkir ərazisində yerləşən "N" saylı hərbi hissəsinin sabiq komandiri, polkovnik-leytenant Arzu İbrahimov bir qrup zabitlə əlbir olaraq, 2004-2005-ci illərdə hərbi hissəyə məxsus yanacaq-sürtgü məhsullarını talamaqla, dövlətə külli miqdarda ziyan vurub. Hərbi hissənin yanacaq-sürtgü məhsulları xidmətinin anbardarı gizir Valeh Qasımov hərbi hissədən taladıqları yanacağa nəzarət etmək və yanacağın maşınlara yüklənməsinə köməklik göstərmək üçün tanışları - Şəmkir rayon Dəllər qəsəbə sakinləri - Sakit Əliyev, Füzuli Vəliyev, Altay Məmmədov, həmin qəsəbədəki yanacaqdoldurma məntəqəsinin sürücüləri - Asəf Süleymanov, Xəyyam Cəfərov, Tahir Səfərov, İlqar Səfərovla qabaqcadan cinayət əlaqəsi qurub. Onlar aralarında yanacağın alınması, daşınması və satılması barədə vəzifə bölgüsü aparıblar. Bundan sonra hərbçilər yanacaq-sürtgü məhsullarını gizli yolla hərbi hissədən çıxararaq, Asəf Süleymanova məxsus Dəllər qəsəbəsində yerləşən yanacaqdoldurma məntəqəsində satıblar. Qabaqcadan razılaşmaqla, əldə edilmiş pulu öz aralarında bölüşdürüblər. Yanacaq-sürtgü məhsulları xidmətinin rəisi Mehdi Abbasov çek tələbnamələrinə bilə-bilə yalan məlumatlar daxil etməklə vəzifə saxtakarlığına yol verib. Bu cinayətin üstü açıldıqdan sonra dəstə üzvləri həbs edilib.
Müəlliflə əlaqə saxlamaq üçün elektron ünvan - [email protected]
