Azərbaycan, Bakı, 02 may / Trend , müxbir S.İlhamqızı/ Müxalifətçi Müsavat Partiyası izacəsiz etiraz aksiyaları və yürüş-mitinqlər keçirə bilər. Bu barədə Trend a açıqlamasında Müsavat Partiyası mərkəzi icra aparatının rəhbəri Arif Hacılı məlumat verib.
Partiya mayın 4-də keçirməyi planlaşdırdığı mitinqlə bağlı Bakı Şəhər İcra Hakimiyyətinə ünvanladığı müraciətində paytaxtın Ukrayna meydanı və Nərimanov kinoteatrı qarşısındakı meydanı təklif etmişdi. Lakin Bakı Şəhər İcra Hakimiyyəti cavab məktubunda partiyanın tədbirini bu ünvanlarda deyil, Bibiheybət qəsəbəsindəki stadionda keçirməyə razılıq verib.
Müsavat Partiyasının Bibiheybətdəki stadionun mitinq üçün yararsız və şəhərdən uzaqda olmasını əsas gətirərək, mitinqi təxirə salmağa məcbur olub.
Hacılı bildirib ki, partiya bazar ertəsi Bakı Şəhər İcra Hakimiyyətindən məhkəməyə şikayət verəcək. Həmçinin, mitinq üçün növbəti dəfə vaxt təyin edilərək, Bakı Şəhər İcra Hakimiyyətinə yenidən müraciət ünvanlanacaq.
"Hakimiyyətin vətəndaşların sərbəst toplaşmaq hüququnu məhdudlaşdıran hərəkətləri, mitinqlərə qadağaları davam edərsə, mitinqlərin icazəsiz keçirilməsi məsələsi aktuallaşacaq. Ona görə də, yaxın zamanda razılaşdırılmamış etiraz aksiyaları, yürüşlər, mitinqlər keçirilməsi istisna olunmur"-deyə Müsavat funksioneri bildirib.
Müəlliflə əlaqə saxlamaq üçün elektron ünvan - [email protected]