Azərbaycan, Bakı, 05 may/ Trend , müxbir İ.Əlizadə/ Azərbaycan Parlamentində hakim Yeni Azərbaycan Partiyasını (YAP) təmsil edən deputatlar müxalifətçi həmkarlarının dövlət büdcəsindən ayrılan vəsaitlərin təyinatı üzrə xərclənib-xərclənmədiyini araşdırmaq üçün Deputat-tədqiqat Komissiyası yaratmasını qanunsuz hesab edirlər. "Müxalifəti təmsil edən deputatların tədqiqat komissiyası yaratması Konstitusiyaya, Parlamentin Daxili Nizamnaməsinə və "Deputat statusu haqqında" qanuna ziddir", -deyə bazar ertəsi Trend -a açıqlamasında YAP icra katibinin müavini, deputat Mübariz Qurbanlı bildirib.
Parlamentdə müxalifəti təmsil edən Müsavat deputat qrupunun üzvü Pənah Hüseyn bildirib ki, dövlət büdcəsindən ayrılan vəsaitlərin təyinatı üzrə xərclənib-xərclənmədiyini, korrupsiya və mənimsəmə hallarının olub-olmadığını araşdırmaq üçün Deputat-tədqiqat Komissiyası yaradacaqlar. Komissiya yaxın günlərlə fəaliyyətə başlayacaq.
Qurbanlı qeyd edib ki, Konstitusiya, Parlamentin Daxili Nizamnaməsi və "Deputat statusu haqqında" qanun belə komissiyaların yaradılmasını istisna edir: "Bu qanuna zidd, əsassız və özbaşına hərəkətlərə rəvac verən təklifdir. Ona görə də YAP və partiyanı təmsil edən deputatlar bunun əleyhinədir".
YAP rəsmisi qeyd edib ki, Parlamentin Hesablama Palatası, yerli və beynəlxalq audit təşkilatları dövlət büdcəsindən ayrılan vəsaitlərin xərclənməsi məsələsini araşdırır və cəmiyyətə məlumat verirlər.
Hüseyn isə bildirib ki, yaradılacaq Deputat-tədqiqat Komissiyasının təkcə müxalifətçilərdən ibarət olması nəzərdə tutulmayıb.
"Dövlət büdcəsindən ayrılan vəsaitlər xalqa məxsusdur və həmin pulların təyinatı üzrə xərclənib-xərcələnmədiyini araşdırmaq məsələsində qanunsuz heç nə yoxdur. Dövlət orqanları özləri bunda maraqlı olmalıdırlar", - deyə Hüseyn əlavə edib.
Məqalə müəllifi ilə əlaqə ünvanı: [email protected]
