Azərbaycan, Bakı, 07 may/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) sabah yerləşdiyi qərargahdan çıxarılacaq. "Sabah ACP rəhbərliyi mənə məxsus olan mülki boşaltmalı və qapıların açarlarını təfil verməlidir", -deyə çərşənbə günü Trend -a açıqlamasında ACP-nin yerləşdiyi mülkün sahibi İdris Quliyev bildirib.
ACP hazırda İçəri Şəhərdə, Kiçik Qala küçəsi 128 ünvanında yerləşən qərargahda fəaliyyət göstərir. Qərargah ACP lideri, parlamentin keçmiş sədri Rəsul Quliyevin bacısının həyat yoldaşı İdris Quliyevə məxsusdur. Eks-spikerlə yezənisi arasında qalmaqal yaranıb. Ona görə də İdris Quliyev ACP-nin ona məxsus olan mülkdən çıxmasını tələb edir.
Quliyev bildirib ki, ACP rərhərliyi ilə imzaladıqları icarə müqaviləsinin müddəti mayın səkkizində başa çatır: "Mən onlara dəfələrlə xəbərdarlıq etmişəm ki, yeni icarə müqaviləsi imzalanmayacaq və qərargahı tərk etməlidirlər".
O qeyd edib ki, mülkü yenidən icarəyə verməyəcək: "Mülkü təmir etdirib, ailəmlə birlikdə ora köçəcəyik".
ACP sədrinin müavini Yaqub Abbasov bildirib ki, sabah mülkün sahibinə yeni icarə müqaviləsi imzalamağı təklif edəcəklər. Müqavilə imzalamaq mümkün olmasa, yeni qərargah axtaracaqlar.
Sağ mərkəzçi, müxalifətyönlü ACP bu ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Azərbaycanın hüquq-mühafizə orqanları Quliyev haqqında cinayət işi açıblar və eks-spiker İnterpolun axtarışına verilib. O, dövlət əmlakını mənimsəməkdə, vəzifəsindən sui-istifadədə, vəzifə səlahiyyətlərini aşmaqda ittiham olunur. Quliyev bu ittihamları rədd edir. 2007-ci ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq, ADP-dən imtina edərək, özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
