Gürcüstan, Tbilisi, 20 may/ Trend , müxbir N.Kirtsxalia/ Parlament seçkilərinin nəticələrinin necə olacağına baxmayaraq, hakim Vahid Milli Hərəkat partiyası bu nəticələrlə razılaşacaq. Bu barədə Trend -a "Qalib Gürcüstan üçün Vahid Milli Hərəkat" (VHM) seçki subyektinin siyahısında nömrə bir David Bakradze məlumat verib.
"VMH gələcək parlamentdə nə qədər yer tutacağına baxmayaraq, seçkilərin nəticələrini tanıyacaq və gələcəkdə yaxşı nəticələrə nail olmaq üçün işini davam etdirəcək", - Gürcüstan prezidentinin xüsusi nümayəndəsi, keçmiş XİN rəhbəri Bakradze çərşənbə axşamı bildirib.
Gürcüstanda parlament seçkiləri mayın 21-nə təyin edilib. Hakim partiya gələcək parlamentdə yerlərin əksəriyyətini tutacağını gözləyir. Konstitusiyaya edilən dəyişikliklərdən sonra deputatların sayı 150-dir.
Bakradzenin rəyinə görə, siyasi fikir ayrılıqları Gürcüstanın zəifləməsinə səbəb olmamalıdır. "Mən bir məsələdə əminəm ki, hakimiyyət ədalətli və düzgün seçkilərin keçirilməsi üçün əlindən gələni edəcək. Ölkənin gələcəyi bundan asılıdır", - Bakradze bildirib.
O həmçinin vurğulayıb ki, yenidən bütün siyasi qüvvələrə "ölkəmiz üçün həyati vacib məsələlərdə əməkdaşlıq etməyi" təklif edir. O, bu məsələlər arasında ərazi bütövlüyünü, yoxsulluqla mübarizə və ölkədə sülh və sabitliyin qorunmasını qeyd edib.