Azərbaycan, Bakı, 21 may / Trend , müxbir D.Xatınoğlu/ Əfqanıstanda təhlükəsizlik problemi ilə yanaşı, iqtisadi qanunvericilikdəki boşluqlar, hökumətin xarici şirkətlərə təminat verə bilməməsi və digər amillər bu ölkənin iqtisadi inkişafına maneçilik törədir. "Əfqanıstanda təhlükəsizlik problemindən daha çox, xarici sərmayələrin cəlb olunmasına maneələr var"-deyə, Əfqanıstanın "Əhməd şah Məsud" Fondunun sədri Abdullah Abdullah Trend -a bildirib.
Əfqanıstan prezidenti Hamid Kərzai mayın 17-də Misirdə keçirilən Beynəlxalq İqtisadi Forumunda iştirak edib. Əfqanıstanın Xarici İşlər Nazirliyinin mətbuat katibi Sultan Əhməd Behinin çərşənbə axşamı Trend -a verdiyi məlumata əsasən, Kərzainin MisirForumunda iştirakının əsas səbəbi ərəb ölkələrini Əfqanıstanda sərmayə yatırmağa cəlb etmək olub.
"Əfqanıstan Konstitusiyasında iqtisadiyyatla bağlı maddələrə ciddi dəyişikliklər edilməli, hökumətin maliyyə böhranı aradan qaldırılmalıdır, əks halda, xarici şirkətlərin ölkəyə sərmayə yatırması mümkun olmayacaq" - deyə, əfqan politoloqu Abdullah çərşənbə günü telefonla Kabildən bildirib.
Onun sözlərinə görə, təkcə xarici şirkətlər deyil, yerli sərmayədarlar da Əfqanıstanda sərmayə yatırmaqdan çəkinirlər. "Bundan əvvəl, bir neçə ərəb şirkəti Əfqanıstanın hava limanına sərmayə qoymağa cəhd göstərdi, lakin iqtisadi qanunların qeyri-müəyyənliyi üzündən, problemlərlə üzləşib geri çəkildilər.
"Ərəb ölkələrinə gəldikdə isə, problem daha da dərinləşir. Ərəblər Taliban hakimiyyətinin devrilməsindən sonra da Əfqanıstana "terror ölkəsi" kimi baxırlar. Digər tərəfdən, bəzi ərəb xalqları Əfqanıstana işğal olunmuş ölkə, ABŞ-ın müstəmləkəsi hesab edirlər. Belə yanaşma ərəb şirkətlərini Əfqanıstanın iqtisadi inkişafında fəal iştirak etməkdən çəkindirir. Halbuki, ABŞ Əfqanıstana deyil, Taliban və "Əl-Qaidə"yə hücum edib, əfqan xalqı isə, "Taliban"ı nə dəstəkləyib, nə də dəstəkləyir" - deyə, əfqan politoloqu bildirib.
Abdullahın sözlərinə əsasən, xarici şirkətlər indiyədək Əfqanıstanda çox məhdud şəkildə sərmayə yatırıblar. "Əfqanıstanın dövlət orqanlarında korrupsiya hallarını müşahidə edən ərəblər çox tez də geri çəkiliblər. Məncə, Əfqanıstan hakimiyyəti, ilk növbədə, sərmayə yatırımına əlverişli şərait yaratmalı, sonra xarici şirkətləri iqtisadi layihələrdə iştiraka çağırmalıdır"-deyə, Abdullah hesab edir.
