Azərbaycan, Bakı, 27 may / Trend , müxbir C.Babayeva/ Azərbaycanın müxalif "Azadlıq" bloku Azərbaycan Xalq Cümhuriyyəti (AXC) İnstitutunun yaradılmasını vacib hesab edir. Bu barədə "Azadlıq" blokunun həmsədri, Azərbacyan Xalq Cəbhəsi Partiyasının sədri Əli Kərimli blokun AXC-nin yaradılmasının 90 illiyinə həsr olunmuş Dəyirmi masada bildirib.
Mayın 28-də Azərbaycan Xalq Cümhuriyyətinin yaradılmasının 90 illiyi tamam olur.
Kərimlinin sözlərinə görə, İnstitut Azərbaycan Xalq Cümhuriyyətinin öyrənilməsi, təbliğ olunması ilə məşğul olmalıdır.
"Azərbaycanı dünyada təbliğ etmək üçün 28 may tarixindən gözəl hadisə yoxdur. Azərbaycan dövlətinin prioritet vəzifəsi AXC-ni və onun qurucularnı bütün dünyada təbliğ etmək olmalıdır", deyə Kərimli bildirib.
Kərimli qeyd edib ki, Azərbaycanda milli-demokratik qüvvələrin həm ölkə daxilində, həm də beynəlxalq aləmdə AXC-ni təbliğ etmək üçün hələlik imkanı yoxdur.
"Azadlıq" blokunun digər həmsədri, Vətəndaş və İnkişaf Partiyasının sədri Əli Əliyevin sözlərinə görə, AXC-nin qurucuları qarşısında bir sıra vəzifələrimiz var. "Onların gördüyü işləri yaşadıb təbliğ etməliyik", deyə Əliyev bildirib.
Onun sözlərinə görə, Azərbaycan Xalq Cümhuriyyətinin qurucusu Məhəmmədəmin Rəsulzadənin ruhunun Azərbaycan torpağında rahat uyumasına nail olmaq qarşıda duran ən əsas vəzifədir. Rəsulzadənin məzarı Ankaranın "Anıti" qəbiristanlığındadır.
"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
