Azərbaycan, Bakı, 03 iyun/ Trend , müxbir E.Babayev / Azərbaycanın müxalif Müsavat Partiyası müxalifətin sammitini təşkil etmək niyyətindədir. "Azərbaycan müxalifətinin birgə sammitinin keçirilməsinə ciddi ehtiyac var və bu sammitdə müxalifətin mövcud vəziyyətdən çıxış yolları, birgə etiraz aksiyalarına başlamaq kimi məsələlərlə bağlı qərarlar qəbul edilməlidir", - deyə çərşənbə axşamı Trend -a Müsavat funksioneri Rauf Arifoğlu bildirib.
Trend -un arayışı: Parlament bu həftənin bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın isə 40 minə endirilməsi nəzərdə tutulur. Bundan əlavə, seçki təbliğatının müddəti 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Müxalifət əlavə və dəyişikliklərdən narazı qalıb.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Arifoğlu bildirib ki, indiki şəraitdə müxalifəti bir araya yığmaq olduqca çətin görünür. "Lakin müxalifət bu çətinlikləri aradan qaldıraraq bir araya gəlməldir" - deyən Arifoğlunun sözlərinə görə, hazırda seçkilərdə iştirak məsələsi aktuallığını itirməkdədir. "Bizdə əminlik yoxdur ki, partiyanın başqanı İsa Qəmbər seçkiyə qatılsa, onun namizədliyi qeydə alınacaq" - deyən Arifoğlu onu da bildirib ki, Azərbaycan müxalifəti yaranmış vəziyyətdən çıxış yolu tapmaq üçün təcili bir araya gəlməlidir.
Müxalif Azərbaycan Demokrat Partiyasının (ADP) sədri Sərdar Cəlaloğlu da çərşənbə axşamı Trend -a bildirib ki, müxalifətin birgə sammitinin keçirilməsinə çoxdan ehtiyac var. Müxalifət liderləri öz şəxsi kaprizlərini bir kənara qoymalıdırlar. "Müxalifətin bir araya gəlməməsi həm siyasi mədəniyyətin olmamasını, həm də milli maraqların arxa plana keçməsini göstərir", - deyə Cəlaloğlu əlavə edib.
Azərbaycan Naminə İctimai Forumun rəhbəri Eldar Namazov da çərşənbə axşamı Trend -a bildirib ki, o, müxalifətin sammitinin keçirilməsinə tərəfdardır. "Sammitin keçirilməsi üçün heç bir problem görmürəm", - deyə o vurğulayıb.
Məqalə müəllifi ilə əlaqə ünvanı: [email protected]
