Azərbaycan, Bakı, 05 iyun/ Trend , müxbir İ.Əlizadə/ Azərbaycan parlamentində müxalifəti təmsil edən Müsavat deputat qrupu hərbi xidmət əleyhinə olan cəzaların yüngülləşdirilməsi üçün Cinayət Məcəlləsində dəyişiklik edilməsi ilə bağlı layihə hazırlayıb. "Hərbi qulluqçuların törətdikləri az ağır cinayətlərə görə verilən cəzalar ağırdır və onların yüngülləşdirilməsinə ehtiyac var", - deyə cümə axşamı Trend -a açıqlamasında Müsavat deputat qrupunun üzvü Nəsib Nəsibli bildirib.
Azərbaycanın Cinayət Məcəlləsinə əsasən, hərbi qulluq əleyhinə olan az ağır cinayətlərə görə, yeddi ilədək azadlıqdan məhrum etmə cəzası nəzərdə tutulur.
2007-ci ildə Ali Məhkəmənin Hərbi məhkəmələrin işləri üzrə məhkəmə kollegiyasında müharibə və hərbi xidmət əleyhinə olan və hərbi qulluqçular tərəfindən törədilən 128 nəfər haqqında olan 106 cinayət işinə baxılıb.
Məcəlləyə görə, rəisin verdiyi əmrin açıqcasına yerinə yetirilməsindən imtina olunması, rəisə və hərbi qulluq vəzifəsini yerinə yetirən digər şəxsə müqavimət göstərmə, zor tətbiq etmə, hərbi qulluqçunu təhqir etmə, döymə və işgəncə vermə, hərbi qulluqçular arasında qarşılıqlı münasibətlərin nizamnamə qaydalarını pozma az ağır cinayətlər hesab olunur.
"Hərbi ekspertlər də hesab edirlər ki, az ağır cinayətlərə görə verilən cəzalar ağırdır və yüngülləşdirilməsinə ehtiyac var. Belə cinayətlərə görə daha çox inzibati və cərimə cəzaları verilməlidir", - deyə deputat əlavə edib.
Onun sözlərinə görə, layihə yaxın günlərədə parlamentə təqdim olunacaq.
Müsavat deputat qrupunun beş üzvü var.
Məqalə müəllifi ilə əlaqə ünvanı: [email protected]
