Azərbaycan, Bakı, 17 iyun / Trend / Türkiyə Prezidenti Abdullah Gül hesab edir ki, qondarma "erməni soyqırımı" iddialarının araşdırılmasını tarixçilərin ixtiyarına buraxmaq lazımdır.
"Tarix yazmaq və araşdırmaq siyasətçilərin və ya parlamentlərin deyil, tarixçilərin, elm adamlarının işi olmalıdır" - deyə Gül çərşənbə axşamı Türkiyənin Bilkənt Universitetində keçirilən "Türkiyənin Sosial və İqtisadi Tarixi" adlı 11-ci beynəlxalq Forumda çıxışı zamanı bildirib. Bu barədə Türkiyənin "Cihan" Agentliyi məlumat yayıb.
Gülün sözlərinə görə, Türkiyə dövlətinin mövqeyi belədir ki, davamlı olaraq gündəmdə saxlanılan qondarma "erməni soyqırımı" məsələsi, tarixdə yaşanan hadisələrlə əlaqədar mübahisələrin həlli tarixçilərə həvalə edilməlidir. O, əlavə edib ki, Türkiyə hökuməti tarixçilərə bu şəraiti yaratmaq üçün əlindən gələni edib. Türkiyənin ən gizli arxivlərinin tarixçilərin ixtiyarında olduğunu deyən prezident Gül ölkəsinin öz tarixi ilə fəxr etdiyini də vurğulayıb.
"Biz tariximizlə barışır və öyünürük" - deyə Türkiyənin dövlət başçısı vurğulayıb.
Türkiyə hökuməti qondarma "erməni soyqrımı" iddialarını təkzib edir və rəsmi bəyanatlarında bildirir ki, 1915-ci ildə Osmanlı İmperiyasında təhlükəsizliyin təmin edilməsi məqsədilə, orada yaşayan erməni əhalisinin köçürülməsi qərarı heç bir halda "soyqırım" sayıla bilməz. Türkiyənin Baş naziri Rəcəb Tayyib Ərdoğan 2005-ci ildən bəri Ermənistana rəsmi müraciətlərində hər iki ölkənin arxivlərinin açılması, ortaq tarixçilər qrupu yaradılaraq, 1915-ci il hadisələrinin onlar tərəfindən araşdırılmasını təklif edib. Ermənistan tərəfi indiyədək bu müraciəti cavabsız qoyub.
Məqalə müəllifi ilə əlaqə saxlamaq üçün elektron ünvan [email protected]
