Azərbaycan, Bakı, 21 iyun / Trend , müxbir E. Babayev/ Azərbaycanın müxalif Müsavat Partiyası "Azadlıq" blokunun fəallarını prezident seçkisində partiyanın namizədinə səs verməyə çağırır. "Bizdə inam var ki, seçkidə iştirak etsək, "Azadlığ"ın fəalları Müsavat Partiyasının namizədinə səs verəcək" - şənbə günü jurnalistlərə Müsavat Partiyası başqanının müavini Qabil Hüseynli bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər.
Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Hüseynli deyib ki, "Azadlıq" blokunun fəalları onlarla söhbətlərində seçkidə iştirakın tərəfdarı olduqlarını bildirirlər. Musavat funksioneri hesab edir ki, indiki şəraitdə müxalifət kütləvi boykota nail ola bilməz, çünki seçkidə iştirak məsələsində fikirlər fərqlidir.
Trend -un arayışı: Müsavat Partiyasının yerli strukturlarında seçkidə iştirak məsələsi ilə bağlı müzakirələr başlayıb. Müzakirələr iyulun 15 - dək yekunlaşacaq və partiya Məclisinin iclasında yekun qərar veriləcək.
Məqalə müəllifi ilə əlaqə ünvanı: [email protected]
