Fransa, Strasburq, 23 iyun / Trend , müxbir A.Məhərrəmli/ Avropa Şurası Parlament Assambleyasının iyun sessiyasında bu ilin oktyabrında Azərbaycanda keçiriləcək prezident seçkisini izləmək üçün AŞ-nin müşahidə missiyasının tərkibi formalaşdırılacaq.
"İyun sessiyasında müşahidə missiyasının tərkibinin formalaşdırılmasına başlanılacaq", - deyə Azərbaycanın AŞPA-dakı nümayəndə heyətinin rəhbəri Səməd Seyidov bu gün Strasburqda jurnalistlərə bildirib.
İyunun 23-də Avropa Şurası Parlament Assambleyasının yay sessiyası işinə başlayıb. Bugünkü Büro iclasında sessiyanın gündəliyi təsdiqlənib. Sessiya dövründə Azərbaycanla bağlı iyunun 24-də müzakirələr aparılacaq.
Seyidovun sözlərinə görə, Büronun iclasında oktyabrda Azərbaycanda keçiriləcək prezident seçkiləri haqda ilkin məlumat verilib: "İyun sessiyasında prezident seçkisini izləyəcək müşahidə missiyasının formalaşdırılmasına başlanılacaq. Siyasi məhbuslarla bağlı məsələ isə müzakirə olunmadı", - deyən Seyidov əlavə edib ki, sessiya müddətində müxtəlif görüşlər keçiriləcək.
O, bu gün AŞPA-nın sədri ilə görüş keçirəcəyini deyib. Seyidovun sözlərinə görə, AŞPA sədri yay sessiyasından sonra Cənubi Qafqaz regionuna səfər edəcək.
Azərbaycan nümayəndə heyətinin rəhbəri onu da deyib ki, gündəlikdə Azərbaycanla bağlı müzakirələrlə yanaşı, məruzəçilərin Ermənistana getməsi və onların məruzəsi əsasında Ermənsitandakı vəziyyətlə bağlı AŞPA-da fövqəladə müzakirələrin aparılması da təsdiq olundu.
Ermənistanla bağlı məsələ isə iyunun 25-də müzakirə olunacaq.
Bu il oktyabrın 15-də Azərbaycanda növbəti prezident seçkisi keçiriləcək.
Məqalə müəllifi ilə əlaqə saxlamaq üçün elektron ünvan: [email protected]
