Azərbaycan, Bakı, 03 iyul / Trend , müxbir İ.Əlizadə / Azərbaycan Avropa Şurası Parlament Assambleyasının (AŞPA) Cənubi Qafqazda mədəni irsin vəziyyətini öyrənməsini vacib hesab edir. "AŞPA-nın Mədəniyyət, Elm və Təhsil Komitəsinin Cənubi Qafqazda mədəni irsin vəziyyətinin öyrənliməsi üzrə məruzəçisi, böyük britaniyalı deputat Edvard O`hara bölgəyə səfərdən imtina etməklə tələsib və səhv addım atıb" - cümə axşamı Trend -a Azərbaycanın AŞPA- dakı nümayəndə heyətinin və qurumun Mədəniyyət, Elm və Təhsil Komitəsinin üzvü Rəfael Hüseynov bildirib.
Trend -un arayışı: 2005-ci ildə AŞPA-nın Mədəniyyət, Elm və Təhsil Komitəsinin Cənubi Qafqazda mədəni irsin vəziyyətinin öyrənilməsi üzrə məruzəçi təyin olunub. Bununla bağlı qəbul olunan qərarda qeyd olunub ki, məruzəçi O`hara tez bir zamanda Azərbaycan, Gürcüstan və Ermənistana səfər etsin. Lakin son üç ildə onun səfəri baş tutmayıb.
Azərbaycan məruzəçinin ölkəyə səfərinə şərait yaratmağa hazır olduğunu bildirib. Rəsmi Bakı hesab edir ki, O`hara Azərbaycan ərazisindən keçməklə, ermənilərin işğalı altında olan Dağlıq Qarabağa səfər etməli və oradakı Azərbaycan abidələrinin vəziyyətini öyrənməlidir. Eyni zamanda, məruzəçi Ermənistan ərazisində olan qədim Azərbaycan abidələrinin vəziyətini öyrənməlidir. Ermənistan isə, məruzəçinin Dağlıq Qarabağa Azərbaycan ərazisindən keçməklə səfər etməsi ilə razılaşmır.
Ermənistan iddia edir ki, Azərbaycan Naxçıvan Muxtar Respublikasında olan qədim "erməni abidələrini" dağıdıb və məruzəçinin Naxçıvana səfər etməsini tələb edir. Azərbaycan O`haranın Naxçıvana səfər etməsinə şərait yaratmağa hazır olduğunu bəyan edib.
Ötən həftə O`hara üzləşdiyi siyasi çətinliklərə görə, bölgəyə səfər etməkdən imtina edib.
Hüseynov hesab edir ki, məruzəçi qəbul etdiyi qərarı dəyişəcək. "Edvard O`hara hissə qapılaraq Cənubi Qafqaza səfərdən imtina edib. O, qərarına dəyişiklik etməlidir".
Onun sözlərinə görə, AŞPA-nın Mədəniyyət, Elm və Təhsil Komitəsi məruzəçinin Cənubi Qafqazın hər üç ölkəsinə-Azərbaycan, Gürcüstan və Ermənistana eyni vaxtda səfər etməsinə dair qərar qəbul edib.
"Mədəniyyət, Elm və Təhsil Komitəsinin 2008-ci il mayın 21-də keçirilən iclasında O`hara bildirib ki, Azərbaycan, Gürcüstan və Ermənistana eyni vaxtda səfər etmək mümkün deyil. Ona görə də ilk növbədə Azərbaycana səfər etmək istəyir. Biz bununla da razılşa bilərdik. Bir şərtlə ki, məruzəçi Azərbaycan ərazisindən keçməklə, Azərbaycanın Ermənistan tərəfindən işğal olunan Dağlıq Qarabağ bölgəsinə və ətraf rayonlara da səfər etsin. İşğal edilən ərazilərdə olan Azərbaycan abidələrinin ermənilər tərəfindən necə dağıdıldığını görsün. Lakin O`hara yalnız Bakı və Naxçıvana səfər etmək istəyirdi. Azərbaycan bununla razılaşa bilməz", - deyə Hüseynov əlavə edib.
Onun fikrincə, məruzəçinin Naxçıvana səfər etməkdə başqa məqsədləri var. Deputat qeyd edib ki, ermənilərin Naxçıvana ərazi iddiaları var: "O`hara Naxçıvana səfər etməklə, ermənilərin iddialarını möhkəmlətmək istəyir. Mən məruzəçinin nəzərinə çatdırmışam ki, Naxçıvanda heç bir qədim erməni abidəsi yoxdur. Əgər O`hara Naxçıvana getməkdə israr edirsə, gəlsin Azərbaycana, Azərbaycan ərazisindən keçməklə Dağlıq Qarabağa səfər etsin və sonra da hara istəyir getsin".
Hüseynovun fikrincə, O`haranan Cənubi Qafqaza səfərdən imtan etməsi Avropa Şurasının bu bölgədəki mədəni irsin vəziyyətinin öyrənilməsi ilə bağlı qərarına təsir etməyəcək. O qeyd edib ki, Avropa Şurası və AŞPA Cənubi Qafqazda mədəni irsin vəziyyətinin öyrənilməsində israrlıdır: "O`hara olmayacaq, məruzəçi başqa deputat təyin olunacaq. Amma məruzəçinin səfəri mütləq baş tutacaq".
Məqalə müəllifi ilə əlaqə ünvanı: [email protected]
