Azərbaycan, Lənkəran, 04 iyul/ Trend , müxbir P.Əliyeva/ Azərbaycanın müxalifət Müsavat Partiyasının Lənkəran rayon təşkilatı prezident seçkisinin boykot edilməsinin əleyhinədir. "Lənkəran müsavatçıları ən ağır vəziyyətdə belə mübarizə aparmaqda israrlıdırlar və boykot taktikasının xeyirli olacağını inkar edirlər", cümə günü Trend -a partiyanın Lənkəran şəhər təşkilatının sədri Yadigar Sadıqov deyib.
Trend -un arayışı: Azərbaycanda prezident seçkisi oktyabrın 15-də keçiriləcək. Partiya Məclisinin ötən ilin dekabrında keçirilən iclasında prezident seçkisində iştirak etmək haqqında qərar qəbul olunub və təşkilatın başqanı İsa Qəmbərin prezidentliyə namizədliyi irəli sürülüb. Milli Məclisin iyunun 2-də keçirilən iclasında Seçki Məcəlləsinə edilən son əlavə və dəyişikliklərdən sonra isə Müsavat Partiyası seçkidə iştirak edib-etməmək məsələsini müzakirəyə çıxarıb. Partiya Divanının ötən ay keçirilən iclasında seçkilərdə iştirak məsələsinin bir daha partiya strukturlarında müzakirə olunması haqda qərar qəbul edilib.
Sadıqov bildirib ki, Lənkəran təşkilatı Şurasının növbəti yığıncağında seçkidə iştirak məsələsi müzakirəyə çıxarılacaq. "Partiya üzvlərinin əhval-ruhiyyəsi rayon təşkilatının seçkilərdə iştirakla bağlı qərar verəcəyinə şübhə yaratmır", - deyə o əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
Məqalə müəllifi ilə əlaqə ünvanı: [email protected]