Azərbaycan, Bakı, 18 iyul/ Trend , müxbir E.Babayev/ Azərbaycanda prezident seçkisinə rəsmən start verildikdən sonra müxalifətin vahid mövqedən çıxış etməsi istiqamətində danışıqların başlanılması nəzərdə tutulur. "Təcrübə göstərir ki, seçki kampaniyasına start veriləndən sonra da fərqli mövqelərdən çıxış edən partiyalar razılığa gələ bilirlər və bir-birlərinə güzəştə gedirlər. Ona görə də mən güman etmirəm ki, müxalifətin birləşməsi imkanları tükənib", cümə günü Trend -a Azərbaycan Naminə İctimai Forumun rəhbəri, seçkilərə müstəqil şəkildə qatılacağını bildirən Eldar Namazov deyib.
Trend -un arayışı: Azərbaycanda prezident seçkisinin bu ilin oktyabrında keçirilməsi planlaşdırılır. MSK yaxın vaxtlarda seçkinin dəqiq tarixini elan edəcək.
Namazov vurğulayıb ki, seçkilərə az qalmış müxalifətin birləşməsi istiqamətində yeniliklərin olması gözləniləndir. "Mən birliyin tərəfdarıyam və indiyə qədər bununla bağlı təşəbbüslərim olub. Seçki prosesinin özü imkan yaradır ki, hər bir namizəd öz imkanlarını, şanslarını götür-qoy edə bilsin. Ona görə də seçki prosesi zamanı yeni bir şərait yaranır və müxalifətin birliyi aktuallaşır, müxalifət partiyaları arasında birliklə bağlı danışıqlar başlanır. Bu baxımdan əvvəlki illərin təcrübəsini nəzərə alsaq, bu seçkilərdə də əksər müxalifətin birliyinin alınmasını istisna etmək olmaz", - deyən Namazov vurğulayıb ki, birləşmə ilə bağlı danışıqlara istər seçkidə iştirak edən, istərsə də iştirak etməyən partiyalar cəlb oluna bilər.
Eldar Namazov - 1993-1999-cu illərdə prezident köməkçisi və Prezident Katibliyinin rəhbəri olub.
Məqalə müəllifi ilə əlaqə ünvanı: [email protected]