Azərbaycan, Bakı, 18 iyul/ Tr , müxbir E.Babayev/ Azərbaycanın hakim Yeni Azərbaycan Partiyasının (YAP) IV qurultayına hazırlıq işləri bu həftə başa çatır. "İyunun 19-da son olaraq YAP-ın Nizami rayon təşkilatının qurultaya hazırlıq üzrə konfransı keçiriləcək və qurultaya nümayəndələr seçiləcək", cümə günü Trend -a YAP icra katibinin müavini, millət vəkili Siyavuş Novruzov bildirib.
Trend -un arayışı: Azərbaycanda prezident seçkisinin bu ilin oktyabrında keçirilməsi nəzərdə tutulur. YAP-ın qurultayı seçkilərlə bağlı çağırılıb.
Novruzov bildirib ki, qurultay avqust ayının əvvəllərinə təsadüf edəcək. "YAP-ın 80-dən artıq rayon təşkilatında konfranslar keçirilib və qurultaya nümayəndələr seçilib. Onların dəqiq sayı və qurultayın dəqiq tarixi yaxın vaxtlarda cəmiyyətə açıqlanacaq", - deyən Novruzov qurultayda hakim partiyanın prezidentliyə namizədinin irəli sürüləcəyini deyib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
