Azərbaycan, Bakı, 21 iyul/ Trend , müxbir E.Babayev/ Hakim Yeni Azərbaycan Partiyası (YAP) Azərbaycanın Konstitusiyasında bir şəxsin dalbadal iki dəfədən artıq prezident seçilməməsini nəzərdə tutan maddənin (101.5) dəyişdirilməsinin xalqın iradəsindən asılı olduğunu bəyan edib. "Əgər insanlar açıq şəkildə iradə nümayiş etdirəcəklərsə, fəaliyyət də buna uyğun olacaq", - Trend -un məlumatına görə, bunu bazar ertəsi YAP-ın sədr müavini və icra katibi Əli Əhmədov deyib.
Trend -un arayışı: Azərbaycanda prezident 5 il müddətinə seçilir. Konstitusiyaya görə, hər hansı şəxs iki dəfədən artıq prezident seçilə bilməz. YAP sədri, İlham Əliyev 2003-cü ildə Azərbaycan prezidenti seçilib. Əgər İlham Əliyev bu ilin oktyabr ayında prezident seçilsə, 2013-cü ildə onun səlahiyyət müddəti bitir. Bir sıra millət vəkilləri Azərbaycanda bir şəxsin dalbadal iki dəfədən artıq prezident seçilməməsini nəzərdə tutan maddənin dəyişdirilməsini gündəmə gətiriblər.
Əhmədov deyib ki, indi əsas diqqət növbəti prezident seçkisinin yüksək səviyyədə keçirilməsinə yönəlib. "2013-cü illə bağlı isə zamanı gələndə düşünəcəyik və ən düzgün qərarlar qəbul olunacaq", - deyən Əhmədov vurğulayıb ki, hər bir qanun o cümlədən Konstitusiya insanlar, xalq tərəfindən qəbul olunur. Ən yüksək hüquq xalqın istəyidir, iradəsidir.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
