Azərbaycan, Bakı, 22 avqust / Trend , müxbir E.Babayev/ Müxalif Azərbaycan Demokrat Partiyası (ADP) hesab edir ki, seçkidə iştirakdan imtina edən partiyaların geniş əməkdaşlıq formatı baş tutmayacaq. "Apardığımız müşahidələr göstərir ki, əslində bu danışıqlar AXCP-Müsavat ittifaqının yaranmasına yönəldilib", cümə günü Tren News-a ADP sədri Sərdar Cəlaloğlu bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq, Milli İstiqlal, Sosial Demokrat partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
"Azadlıq" blokunun Sədrlər Şurasının ötən həftənin sonu keçirilən toplantısında seçkidə iştirakdan imtina edən partiyaların əməkdaşlıq mərəkəzinin formalaşması barədə qərar verilib. Bu istiqamətdə danışıqlar aparmaq üçün blokun adından AXCP funksioneri Fuad Mustafayevə səlahiyyət verilib. Mustafayev bildirib ki, əməkdaşlığın əsas prinsipi seçkilərin qeyri-legitim olduğunun qəbul edilməsi və təsdiq olunmasıdır. "Hansı partiyalar ki, bunu edəcəklər, onlarla əməkdaşlıq dərhal başlanılacaq", - deyə o əlavə edib.
Cəlaloğlu bildirib ki, indiyə qədər əməkdaşlıq formatının yaranması ilə bağlı ADP ilə hər hansı danışıqlar aparılmayıb. Onun sözlərinə görə, indiyə qədər birliyin yaradılması istiqamətində aparılan danışıqlar və açıqlamalar heç də geniş birliyin yaranmasına xidmət edilmədiyini ortaya qoyur. "Mənim müşahidələrim ondan ibartədir ki, bu təmsalar AXCP ilə Müsavat arasında əəməkdaşlığın yaranmasına xidmət edir", -deyən Cəlaloğlu məsələ ilə bağlı əlavə şərh vermək istəməyib.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]