...

Əfqanıstanda gələcək prezident seçkilərinin keçirilməyəcəyi haqda şübhələr getdikcə artır

Siyasət Materials 1 Sentyabr 2008 16:50

Trend-i buradan izləyin

Əfqanıstan, Kabil, 01 sentyabr / Trend A. Həkimi / Əfqanıstanda sabitliyin pozulması nəticəsində hökumət və xalq arasında inamsızlıq yaranıb, qanuna əməl olunmaması, yaranmış hərc-mərclik və siyasətçilər arasında fikir ayrılığı gələcək prezident seçkilərinin keçirilməyəcəyi ehtimalını daha da artırır.

Trend un Kabildəki müxbirinin məlumatına görə, Milli Birlik Şurası (hakim partiyaya müxalif birlik) gələcək prezident seçkilərinin keçirilməsi, problemlərin həll edilərək aradan qaldırılması üçün beynəlxalq konfransın keçirilməsini tələb edib.

Milli Birlik Şurasının hazırki sədri Cəfər Kuhistani hakim partiyaya qarşı müxalif olan bütün qüvvələrin və hakimiyyətlə silahlı mübarizə aparan qrupların (Taliban) da bu konfransda iştirakını vacib sayır.

Hazırda Milli Birlik Şurası ölkədə gələcək prezident seçkiləri ilə bağlı problemlərin həll olunması məqsədilə "Seçkilərin bu gününün və sabahının araşdırılması" adlı elmi seminar keçirir. Seminar iştirakçıları gələcək prezident seçkilərinin keçirilməməsində əsas mane olaraq sabitliyin pozulmasını, narkotik maddələrin əkilməsi və istehsalını, qanunun gücsüzlüyünü, hakimiyyət və xalq arasında inanmsızlığın hökm sürməsini və ölkə vətəndaşlarının dəqiq siyahıya alınmamasını göstəriblər.

Kuhistani Pakistanla sərhəd probleminin həllinin Əfqanıstanda sabitliyin yaranmasında böyük rol oynayacağına əmin olduğunu bildirib. Onun fikrincə, əgər Əfqanıstan və Pakistan arasında olan sərhəd problemi aradan qaldırılarsa, Əfqanıstanda sabitlik təxminən 70 faiz təmin olunar. O əlavə edib ki, Pakistan və Əfqanıstan arasında ixtilafların əsas səbəbi sərhəd problemi ilə bağlıdır. İki ölkə arasında sərhəd problemi on illərdir ki, həll olunmamış qalır.

"Regional əməkdaşlıq vasitəsilə bəzi region və qonşu ölkələrin Əfqanıstanın daxili məsələlərinə qarışmasının qarşısını almaq olar", - deyə Kuhistani bildirib. Onun fikrincə, bəzi qonşu ölkələr və uzaq qonşular Əfqanıstanda prezident seçkisi öncə sabitliyin pozulmasında böyük rol oynayırlar.

Milli Birlik Şurasının digər üzvi Həfiz Mənsur bildirib ki, əgər Əfqanıstanda prezident seçkiləri hansısa səbəbdən keçirilməzsə, bu məsələdə uduzan tərəf ölkə vətəndaşları və udan tərəf isə dövlətə qarşı silahlı qarşıdurmalar yaradan qruplar və Əfqanıstanın düşmənləri olacaq. Mənsur bildirib ki, seçkilər mütləq keçirilməlidir, əks təqdirdə, ölkənin düşmənlərinin gücü arta bilər.

Bəzi ekspertlərin fikrincə, hazırki prezident Hamid Kərzai sabitliyi pozacaq faktların artması hesabına prezident seçkilərinin keçirilmə vaxtının yubadılmasında maraqlıdır.

Mənsur əlavə edib ki, hökumət və xalq arasında inamsızlıq toxumu əkənlərə gələcək prezident seçkilərində səs vermək olmaz. Onun sözlərinə görə, Əfqanıstanda prezident seçkilərinin keçirilməsi bəzi problemlərin həllindən asılıdır ki, hakimiyyət isə bu problemlərin həllində acizdir.

Bu arada ölkədə seçkilərin keçirilməsinə məsul Əfqanıstanın Seçki Komissiyası siyasətçilər və parlament nümayəndələri tərəfindən güclü tənqid atəşinə tutulub.

Kuhistani Seçki Komissiyasını bitərəf olmamaqda və müstəqil hərəkət etməməkdə ittiham edib. O bildirib ki, hazırda fəaliyyət göstərən Seçki Komissiyası müstəqil və bitərəf bir qurum deyil, hətta dövlətə

bağlı bir qurumdur. "Seçki Komissiyasının üzvləri parlament nümayəndələri tərəfindən seçilir, bu qurumun sədrini isə prezident Kərzai həmin üzvlərin arasından səxsən özü seçir. Bu o deməkdir ki, prezident komissiya sədrini tam nəzarəti altında saxlaya bilər", - deyə Kuhistani bazar ertəsi bildirib. Onun fikrincə, Seçki Komissiyası maliyyə və təşkilati baxımdan müstəqil bir qurum olmalıdır.

Bütün bu problemlərə baxmayaraq, hazırda Əfqanıstanda istər parlament nümayəndələri və dövlət qurumları, istərsə də siyasi partiyalar və vətəndaşlar gələcək prezident seçkilərinə hazırlaşırlar.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti