Azərbaycan, Bakı, 02 sentyabr / Trend , müxbir S.Kazımlı/ Azərbaycan paytaxtında istintaqı aparılan "GEN" MMC-nin işi ilə bağlı yeni həbslər olub.
Bakı şəhər Baş Polis İdarəsinin istintaq şöbəsinin rəisi Yaşar Haqverdiyev çərşənbə axşamı Trend -a bildirib ki, şənbə günü şirkət tərəfindən tikilən evlərin vətəndaşlara satılmasında vasitəçilik edən Mütəllim Babayev Azərbaycan Cinayət Məcəlləsinin külli miqdarda ziyan vurmaqla dələduzluq törədilməsi (178.3.2-ci) maddəsi ilə təqsirləndirilərək barəsində həbs-qətimkan tədbiri seçilib. Haqverdiyev şirkət direktorunun kadrlarla iş üzrə müavini Mehbarə Cəfərzadəyə qarşı da həmin gün ittiham elan olunduğunu bildirib.
"GEN" MMC-nin rəhbəri Elbrus Əliyevin vəkili Telman Qasımov Trend -a açıqlamasında faktı təsdiqləyib.
Vəkilin sözlərinə görə, istintaq Cəfərzadəni təqsirləndirilən şəxs kimi tanıyıb və ona Azərbaycan Cinayət Məcəlləsinin külli miqdarda ziyan vurmaqla dələduzluq törədilməsi (178.3.2-ci) maddəsi ilə ittiham elan olunub.
Qasimov bildirib ki, istintaqda Cəfərzadədən istintaqdan icazəsiz hec yerə getməməsi haqda iltizam alınıb. Hazırda o, polisin nəzarəti altındadır.
"GEN" MMC-nin rəhbəri Elbrus Əliyev iyunun 11-də saxlanılıb və Nəsimi rayon məhkəməsinin qərarı ilə barəsində 3 ay müddətinə həbs-qətimkan tədbiri seçilib. Əliyev barəsində Cinayət Məcəlləsinin 178.3.2 (külli miqdarda ziyan vurmaqla dələduəluq etmə) maddəsi ilə cinayət işi başlanılıb.
Bundan bir müddət sonra "GEN" MMC-nin rəhbəri Əliyevin müavini Nəbi Məmmədov və şirkətin mühasibi Həbib Ağayev həbs olunublar. Onlar Azərbaycan Cinayət Məcəlləsinin178.3.2-ci (dələduzluq, külli miqdarda ziyan vurmaqla törədildikdə) maddəsi ilə təqsirləndirilərək, barələrində Nəsimi rayon məhkəməsinin qərarı ilə həbs qətimkan tədbiri seçilib.
İyulun 3-də şirkətinin baş mühasibi Əliyar Abbasov saxlanılıb. Abbasov şirkətin prezidenti Əliyevlə birgə dələduzluqda ittiham olunub. Abbasov barədə 2 aylıq həbs qətimkan tədbiri seçilib.
Məqalə müəllifi ilə əlaqə ünvanı: [email protected]