Azərbaycan, Bakı, 08 sentyabr / Trend , müxbir C.Babayeva/ Azərbaycanın müxalif Müsavat partiyası hesab edir ki, prezident seçkisi ilə bağlı bəzi müxalifət partiyalarının birgə bəyanatına digər siyasi təşkilatlar qoşulmayacaq. "Müxalifətin yeni əməkdaşlıq formatında təmsil olunan partiyaların sayının artacağını gözləmirəm", - bazar ertəsi Trend -a Müsavat partiyası Mərkəzi İcra Aparatının rəhbəri Arif Hacılı bildirib.
Trend - un arayışı: Azərbaycanda prezident seçkisi oktyabrın 15- də keçiriləcək.
"Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf partiyası, Müsavat və "Azərbaycan Naminə" İctimai Forum ötən həftə seçkini qanunsuz hesab etmək barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Hacılının sözlərinə görə, birgə bəyanata digər müxalifət partiyalarının qoşulması ilə bağlı hər hansı müzakirələr aparılmır. "Bəyanata qoşulması nəzərdə tutulan partiyalar bu məsələdə fərqli mövqe nümayiş etdirdilər", deyə o bildirib.
O, Azərbaycan Demokrat Partiyasının imzalanmış birgə bəyanatın müxalifətin gələcək əməkdaşlığına ciddi zərbə vurması ilə bağlı fikrini şərh etməkdən imtina edərək, partiyanın bu mövqeyini yanlış hesab etdiyini bildirib.
Hacılı onu da bildirib ki, bazar ertəsi Müsavat partiyası Divanının toplantısında müxalifətin yeni əməkdaşlıq mərkəzində fəaliyyət perspektivləri, regiondakı vəziyyət müzakirə olunub. "Sentyabrın 15 - də Bakının işğaldan azad olunması günü ilə əlaqədar bir neçə tədbirin keçirilməsi barədə qərar qəbul olunub. Həmin gün Müsavat partiyası Şəhidlər Xiyabanında türk əsgərlərinin xatirə abidəsini ziyarət edəcək və bu mövzu ilə əlaqədar Dəyirmi Masa və digər tədbirlər təşkil edəcək",- deyə o əlavə edib.
Məqalə müəllifi ilə əlaqə saxlamaq üçün ünvan: [email protected]