...

Azərbaycanın müxalifət partiyası prezidentliyə namizədlərin müraciətlərinə baxmağa hazırdır

Siyasət Materials 11 Sentyabr 2008 15:53

Trend-i buradan izləyin

Azərbaycan, Bakı, 11 sentyabr / Trend , müxbir C.Babayeva/ Azərbaycanın müxalif Milli-Demokrat Partiyası (AMDP) hesab edir ki, təbliğat-təşviqat kampaniyası dövründə prezidentliyə namizədlər tərəfindən partiyaya dəstəklə bağlı müraciətlər olunarsa, partiya bütün müraciətlərə baxmağa hazırdır.

"Partiyanın prezident seçkisində iştirak forması ilə bağlı son qərarı yaxın 10-15 gündə keçiriləcək partiyanın Böyük Məclisinin toplantısında qəbul olunacaq", cümə axşamı Trend -a AMDP sədri Tufan Kərimli bildirib.

Trend -un arayışı: Azərbaycanda prezident seçkisi oktyabrın 15-də keçiriləcək. Azərbaycanın Mərkəzi Seçki Komissiyası Yeni Azərbaycan Partiyasının namizədi İlham Əliyev, Ümid Partiyasının sədri İqbal Ağazadə, Müasir Müsavat Partiyasının sədri Hafiz Hacıyev və Böyük Quruluş Partiyasının sədri Fazil Qəzənfəroğlunun namizədliklərini rəsmən təsdiqləyib.

Azərbaycan Milli Demokrat Partiyası dövlət qeydiyyatı olmadığı üçün öz namizədi ilə seçkiyə qatıla bilməyib.

Kərimlinin sözlərinə görə, sədri olduğu partiya prezident seçkisini mühüm siyasi proses kimi qəbul etdiyinə görə, özünü bu prosesdən kənarda görmür. "Kənarda qalmağımız partiyanın fəaliyyətsizliyini göstərmiş olar. Partiya qarşısında aktiv siyasi fəaliyyətlə məşğul olmaq məqsədi qoyub", - deyə partiya sədri bildirib.

Trend -un arayışı: AMDP 1993-cü ildə yaradılıb və ilk adı "Boz Qurd" olub. 1994-cü ildə Ədliyyə Nazirliyində dövlət qeydiyyatına alınıb. 1995-ci ildə Ali Məhkəmə partiyanın adının müvafiq olmadığını əsas gətirərək, "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999-cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edir. Partiyanın keçmiş sədri, sabiq daxili işlər naziri İsgəndər Həmidov 1995-2004-cü illərdə həbsdə olub. 15 il azadlıqdan məhrum edilən Həmidov 2004-cü ildə prezidentin əfv fərmanı ilə azadlığa çıxıb.

Bu ilin aprelində Həmidov partiya sədrliyindən istefa verib. O, istefasını partiyada sədrliyə layiq şəxslərin olması və onlara yol açmaq istəməsi ilə izah edib. AMDP-nin nöbvbədəkənar IV qurultayında Böyük Məclis sədri Kərimli partiyanın sədri seçilib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti