...

Azərbaycanın hakim partiyası eks-prezidentin ittihamlarını əsassız sayır

Siyasət Materials 25 Sentyabr 2008 14:23

Trend-i buradan izləyin

Azərbaycan, Bakı, 25 sentyabr / Trend , müxbir C.Babayeva, İ.Əlizadə/ Azərbaycanın eks-prezidentli Ayaz Mütəllibov hesab edir ki, bəzi müxalifət partiyalarının seçkini boykot etmələrindən iqtidar nəticə çıxarmalıdır.

"Əgər Azərbaycanda Avropa standartlarına uyğun demokratiya olsaydı, prezident seçkisi demokratik və şəffaf keçirilsəydi, boykot və etirazlara heç bir əsas olmazdı", - deyə Mütəllibov cümə axşamı telefonla Trend -a bildirib.

Trend -un arayışı: Azərbaycanda prezident seçkisi oktyabrın 15-də keçiriləcək. Sentyabrın əvvəlində "Azadlıq" blokuna daxil olan partiyalar ї Xalq Cəbhəsi, Liberal Partiya, Vətəndaş və İnkişaf partiyası, Müsavat Partiyası və "Azərbaycan Naminə" İctimai Forum oktyabrın 15-də keçiriləcək prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.

Mütəllibovun sözlərinə görə, bəzi müxalifət partiyalarının prezident seçkisini boykot etməklə bağlı qərarları düşünülmüş şəkilə qəbul olunub. "Azərbaycanda demokratik seçki keçirilməsə, beynəlxalq aləmdə Azərbaycanın imicinə böyük zərbə dəyəcək", - deyə eks-prezident bildirib.

Mütəllibovun fikrincə, prezident seçkisindən sonra da Azərbaycandakı problemlər öz həllini tapmayacaq, müxalifət partiyaları da fəaliyyətlərini davam etdirəcək.

Hakim Yeni Azərbaycan Partiyası (YAP) icra katibinin müavini, prezidentliyə namizəd İlham Əliyevin vəkili Siyavuş Novruzov isə Trend -a bildirib ki, Azərbaycan siyasətində Ayaz Mütəllibov adlı siyasətçi yoxdur və onun nə dediyi hakimiyyəti maraqlandırmır.

YAP rəsmisi deyib ki, prezident seçkisi azad, demokratik və şəffaf keçiriləcək. "Bunun üçün hər cür şərait yaradılıb.

"ATƏT, Avropa Şurası və digər beynəlxalq təşkilatlar bəyan ediblər ki, Azərbaycanın Seçki Məcəlləsi azad, demokratik və şəffaf seçkilər keçirməyə imkan verir", - deyə o əlavə edib.

Trend -un arayışı: ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Ayaz Mütəllibovdur.

1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. Sonra barəsində cinayət işi açılıb və 1992-ci ildən indiyədək Rusiyada mühacirətdə yaşayır.

Trend -un arayışı: YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildən artıqdır hakim partiya olan YAP-ın indiki sədri prezident İlham Əliyevdir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti