Azərbaycan, Bakı, 25 sentyabr / Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) yerləşdiyi qərargahdan çıxarılıb.
"Partiyanın əmlakını təşkilat funksionerlərindən birinin evinə köçürmüşük və hazırda orada fəaliyyət göstəririk", cümə axşamı Trend -a ACP sədrinin müavini Yaqub Abbasov bildirib.
Trend -un arayışı: ACP İçəri Şəhərdə, Kiçik Qala küçəsi 128 ünvanında yerləşən qərargahda yerləşirdi. Qərargah ACP lideri, parlamentin keçmiş sədri Rəsul Quliyevin bacısının həyat yoldaşı İdris Quliyevə məxsusdur. Eks-spikerlə yeznəsi arasında qalmaqal yaranıb. Ona görə də İdris Quliyev ACP-nin ona məxsus olan mülkdən çıxmasını tələb edirdi. ACP rəhbərliyi ilə mülk sahibinin imzaladığı bir illik müqavilənən müddəti mayın 8-də başa çatıb.
Mülkün sahibi qərargahı boşaltmaqla bağlı Səbail rayon Məhkəməsinə müraciət etmişdi. ACP həmin qərardan Bakı Apellyasiya Məhkəməsinə şikayət vermişdi. Apellyasiya Məhkəməsi qərargahın boşaldılması ilə bağlı qərarı qüvvədə saxlayıb.
Abbasov qeyd edib ki, hazırda yeni qərargah axtarırlar və bir necə ünvanda olan ofislərə baxış keçiriblər: "Yaxın günlərdə yeni qərargah icarəyə götürəcəyik. Bəzi problemlər var və onları həll etməyə çalışırıq. Amma qərargahsız olmağımız mümkün deyil. Çünki fəaliyyət göstərmək üçün qərargah olmaldır".
Onun sözlərinə görə, bəzi şəxslər özlərinin çirkin və şəxsi ambisiyalarını, maddi maraqlarını təmin etmək və gəlir götürmək üçün ACP-ni qərargahdan çıxarmağa nail olublar: "Mən hələlik həmin şəxslərin adını açıqlamaq istəmirəm. Onlar mülkün sahibini inandırdılar ki, ACP qərargahdan çıxarılmaldır. Partiya xoşagəlməz proseslərin qurbanı oldu".
Abbasov deyib ki, həmin şəxslər partiyanın yeni qərargahla təmin olunmasına şərait yaratmasalar, onların adlarını açıqlayacaqlar, eyni zamanda, həmin şəxslərin törətdikləri cinayətlərlə bağlı hüquq-mühafizə orqanlarına müraciət edəcəklər: "Onların hansı cinayətlərdə iştirak etdiklərini bütün cəmiyyətə açıqlayacağıq".
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Azərbaycanın hüquq-mühafizə orqanları Quliyev haqqında cinayət işi açıblar və eks-spiker İnterpol vasitəsi ilə beynəlxalq axtarışa verilib. O, dövlət əmlakını mənimsəməkdə, vəzifəsindən sui-istifadədə, vəzifə səlahiyyətlərini aşmaqda ittiham olunur. Quliyev bu ittihamları rədd edir. 2007-ci ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]