Azərbaycan, Bakı, 06 oktyabr / Trend , müxbir C.Babayeva/ Azərbaycanda prezident seçkisini boykot etmiş bəzi müxalif siyasi təşkilatlar xalqa müraciət etmək məqsədilə efir vaxtının ayrılması üçün İctimai Televiziyaya (İTV) yenidən müraciət ediblər.
"İctimai Televiziya müxalifət partiyalarına seçki dövründə efir vaxtı ayırmağa borcludur və ona görə də, yenidən müraciət etmək barədə qərar qəbul olunub. Qanunda müxalifətə efir vaxtından istifadəyə qadağa qoyulmayıb", - deyə Müsavat Partiyası Mərkəzi İcra Aparatının rəhbəri Arif Hacılı Trend - a bildirib.
Trend -un arayışı: Azərbaycanda prezident seçkisi oktyabrın 15 - də keçiriləcək. Sentyabrın əvvəlində "Azadlıq" blokuna daxil olan partiyalar ї Azərbaycan Xalq Cəbhəsi Partiyası, Liberal Partiya, Vətəndaş və İnkişaf Partiyası; Müsavat Partiyası və "Azərbaycan Naminə" İctimai Forum prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Siyasi təşkilatların efir vaxtının ayrılması ilə bağlı müraciəti İTV rəhbərliyi tərəfindən mənfi cavablandırılıb.
Hacılının sözlərinə görə, Avropa Şurasının tələbi ilə yaradılmış İTV Azərbaycanda fikir plüralizmini, siyasi fikirlərin ictimaiyyətə çatdırılmasını təmin etməlidir. "İTV funksiyasını yerinə yetirmək əvəzinə, həm kommersiya fəaliyyəti, həm də hakimiyyətin müdafiəsi fəaliyyəti ilə məşğuldur. Bu da İTV- nin qarşısına qoyulmuş funksiyalarına ziddir. İTV yalnız seçki dövründə deyil, bütün dövrlərdə bütün siyasi qüvvələrin fikirlərini onun efirindən səsləndirməsinə şərait yaratmağa borcludur",- deyə o bildirib.
O, əlavə edib ki, növbəti dəfə İTV- dən mənfi cavab alınarsa, bu proses məhkəmə ilə nəticələnə bilər.
Hacılının bildirdiyinə görə, birgə bəyanat imzalamış müxalif siyasi təşkilatlar aksiyalar və forumla bağlı müzakirələri davam etdirir. "Aksiyalarla bağlı müzakirələrdə çətinliklər var. Müxalifət partiyalarının bir çoxunun ofisinin olmaması, normal fəaliyyət imkanlarının məhdudluğu və digər texniki problemlər məsləhətləşmələrin sistemli aparılmasını çətinləşdirir. Bununla belə, seçkiyə qədər qərarların qəbul olunmasına nail olmağa çalışacağıq. Forumla bağlı bütün hazırlıqlar başa çatıb, yalnız keçirilimə yeri ilə bağlı problem qalmaqdadır. Forumun Müsavat Partiyasının qərargahında keçirilməsi də müzakirə olunur",- deyə Hacılı bildirib.
Məqalə müəllifi ilə əlaqə saxlamaq üçün ünvan: [email protected]