Azərbaycan, Bakı, 06 noyabr / Trend , müxbir İ.Əlizadə/ Azərbaycanın hakim Yeni Azərbaycan Partiyası (YAP) bir şəxsin iki dəfədən artıq ölkə prezidenti seçilməsini qadağan edən maddənin Konstitusiyadan çıxarılması üçün referendum keçirilməsini təklif edir.
"Konstitusiyanın bir şəxsin iki dəfədən artıq prezident seçilməsini qadağan edən maddəsi demokraitik prinsiplərə uyğun deyil və demokratiyanı məhdudlaşdırır", - cümə axşamı Trend - a YAP icra katibinin müavini, deputat Siyavuş Novruzov bildirib.
Trend - un arayışı: Azərbaycan Konstitusiyasının 101-ci maddəsinin 5 - ci bəndinə əsasən, heç kəs iki dəfədən artıq təkrarən prezident seçilə bilməz. Prezidentin səlahiyyət müddəti beş ildir.
Rusiyanın dövlət başçısı Dmitri Medvedyev ötən gün Federal Şuraya ilk müraciətində prezidentin səlahiyyət müddətinin dörd ildən altı ilə, parlamentin səlahiyyət müddətinin dörd ildən beş ilə qədər artırılmasının təklif edib. Bəzi ekspertlər hesab edirlər ki, Azərbaycanda da prezidentin səlahiyyət müddətinin artırılmasına və bir nəfərin iki dəfədən artıq prezident seçilməsi qadağasının ləğv olunmasına ehtiyac var.
YAP rəsmisi hesab edir ki, Konstitusiyada belə bir limit ola bilməz. "Konstitusiya bir şəxsə necə dəfə istəsə deputat seçilməyə icazə verir. Lakin prezident seçilməyə limit tətbiq olunub. Hesab edirik ki, Konstitusiyada belə bir məhdudiyyət tətbiq etmək olmaz. Ona görə də, Konstitusiyada dəyişikliyə ehtiyac var və biz belə bir təşəbbüslə çıxış edəcəyik", -deyə Novruzov əlavə edib.
Onun fikrincə, Azərbaycanda prezidentin səlahiyyət müddətinin artırılmasına ehtiyac yoxdur.
Parlamentin Aqrar siyasət daimi komissiyasının sədri, hakim partiyanı təmsil edən deputat, YAP Siyasi Şurasının üzvü Eldar İbrahimov isə, cümə axşamı Trend - a deyib ki, Azərbaycanda həm parlamentin, həm də prezidentin səlahiyyət müddətinin artırılmasına ehtiyac var.
"Azərbaycan Ermənistanla müharibə şəraitindədir. Ona görə də, prezidentin səlahiyyət müddəti nə qədər çox olsa, böyük işləri həyata keçirməyə bir o qədər imkanı olar. Mən 20 ildir deputatam və deyə bilərəm ki, beş il çox az müddətdir", - deyə komissiya sədri əlavə edib.
İbrahimov da hesab edir ki, bir şəxsin iki dəfədən artıq prezident seçilməsini məhdudlaşdırmaq olmaz.
"Necə olur ki, mən dörd dəfə deputat seçilə bilirəm, lakin prezident işlədiyi, vəzifəsinin öhdəsindən gəldiyi, xalqın etimadını doğrultduğu və fiziki cəhətdən sağlamılğı buna imkan verdiyi halda, iki dəfədən artıq dövlət başçısı seçilə bilməz? Bu qadağa insan hüquqlarının və prezidentin haqqının tapdalanması deməkdir. Zamanın tələbi ilə biz bu məsələlərə yenidən baxmalı olacağıq", - İbrahimov əlavə edib.
YAP 1992 - ci ildə, o vaxt Naxçıvan Ali Məclisinin sədri vəzifəsində işləmiş Heydər Əliyev tərəfindən yaradılıb. Azərbaycanda 15 ildən artıqdır hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
